पत्रकारिताभित्र मौलाएको अहम्ता

समाजको आँखाको रातीगेडी भनेर चिनिने पत्रकार नागरिकले तेस्रो आँखाको रुपमा लिने गरेका छन् । राज्यले सञ्चारकर्मीलाई राज्यको चौथो अंगको रुपमा सम्मान गरेको छ । यि वाक्यांशहरुले पत्रकारको महत्व र सान्दर्भिकताका बारेमा थप चर्चा परिचर्चा गरिराख्नु नपर्ला ।
यो महान् उपमाभित्र पत्रकारले आफ्नो जिम्मेवार कति पूरा गरे, त्यो खोजीको विषय आम पाठकमा भएको छ । पछिल्लो समय केही पार्टी पत्रकारका कारण पत्रकारितको आस्थामै चोट पुगेको तथ्य सार्वजनिक भएका छन् । यहाँसम्म कि स्थानीय सरकारदेखि राष्ट्र प्रमुखका अघिपछि रहनेहरुले देखाएको मालिकभक्तिका कारण स्वतन्त्र ढंगबाट कलम चलाउनेहरु विस्थापित हुने सम्भावना बढेर गएको छ ।
“हुन त जसको नुन खानु, उसको गुनगान गाउनु” भन्ने उक्ति नेपाली समाजमा स्थापित छ । यो संस्कार पत्रकारितामा पनि लागू हुँदा पत्रकारमाथि प्रश्न चिन्ह खडा गरिदिएको छ । उदाहरणका लागि प्रधानमन्त्री कार्यालय मातहतमा रहने पत्रकारले त्यहाँभित्र रहेका अनियमितता सार्वजनिक गर्ने हिम्मत राख्छ ? किमार्थ सक्दैन । किनकी त्यहाँ नुन जोडिएको छ । यो रोग स्थानीय तहदेखि माथिसम्मै छ । जसको पुष्टि नेकपाका वरिष्ठ नेता माधवकुमार नेपालले सार्वजनिक रुपमै उद्घोष गरेर प्रष्ट्याइदिनुभएको छ ।
यसबारेमा आफूलाई उपल्लो दर्जाको पत्रकार भन्न रुचाउने सञ्चारकर्मीले हिम्मत नजुटाएसम्म यो समस्या भुसको आगोझैं सल्किरहने छ । यो अवस्थामा प्रेस काउन्सिल नेपालले जारी गरेको आचारसंहितालाई गिज्याइरहेको भान हुन्छ । यसरी आचारसंहितामाथि नै प्रश्न चिन्ह खडा गर्ने किसिमले प्रस्तुत हुनु कस्तो पत्रकारिता होला ? “आचारसंहिता पालना गरौं, प्रेस स्वतन्त्रता र मर्यादित पत्रकारिताको विकासका लागि अघि सरौं ।” भन्ने मूल मर्मको भावना माथि नै प्रहार गर्न खोज्नुले पत्रकारिताभित्र मौलाएको अहम्ताका बारेमा खोजी हुनु आजको आवश्यकता रहेको छ । जुन किसिमको पत्रकारितालाई कमाउधन्दाका रुपमा साधन बनाउन खोज्नेहरुबाट पत्रकारिता जोगिन सकेन भने यसले गम्भीर संकट ननिम्त्याउला भन्न सकिन्न । त्यसैले भविष्यमा पत्रकारिता क्षेत्रमा निम्तिने डरलाग्दो रुपका बारेमा सामना गर्ने हैसियत सम्बन्धित निकायले राख्नुपर्ने देखिन्छ ।
तसर्थ, त्यस किसिमका कुकिर्तेहरुको अन्त्यका लागि समयमै नीति, विधि सहित सरोकारवाला निकाय प्रस्तुत हुन जरुरी भइसकेको छ । अन्यथा, रातारात मौलाएको अहम्ताले पत्रकारितामै पूर्णविराम नलगाउला भन्न सकिने अवस्था रहेन ।