स्रष्टाहरु सम्मानित हुँदैछन्

काभ्रे । विगत आठ वर्षदेखि निरन्तर प्रकाशित काभ्रेली साहित्यिक पत्रिका अक्षरमार्गले नेपाली भाषा, साहित्य र कलामा महत्वपूर्ण योगदान गर्ने पाँच जना साहित्यिक स्रष्टालाई सम्मान गर्ने जानकारी एक समारोहबीच गराएको छ ।

कार्यक्रममा साहित्यिक पत्रिका अक्षरमार्गले आफ्नो वार्षिक उत्सव पारेर स्रष्टालाई सम्मान गर्ने जनाएको हो । सम्मानित हुने स्रष्टाहरूमा ‘विष्णुहेम अक्षरमार्ग वरिष्ठ साधक सम्मान’ बाट वरिष्ठ साहित्यकार श्रीओम श्रेष्ठ, ‘नरबहादुर अक्षरमार्ग स्रष्टा सम्मान’ वरिष्ठ साहित्यकार तथा प्राध्यापक विष्णु एस राई, ‘कृष्णसुन अक्षरमार्ग साहित्यिक पत्रकार सम्मान’ बाट बियोगी बुढाथोकी, ‘कृष्णदास अक्षरमार्ग स्रष्टा सम्मान’ बाट कवि सुरेन्द्र अस्तफल, ‘अक्षरमार्ग भरतराज काभ्रेली सम्मान’ बाट तारा के.सी रहेका छन ।

सम्मानको साथमा स्रष्टाहरुको तर्फबाट मुक्तकमा समवेत स्वरहरू पनि लोकार्पण हुने जानकारी आयोजकले उक्त समारोहमा गराएको छ । सम्मानित हुने पाँचै जना साहित्यिक स्रष्टाहरुलाई यही चैत्र १४ गते एक कार्यक्रम बीच ऐतिहासिक धार्मिक नगरी पनौतीमा सम्मान समर्पण गरिने समेत जानकारी साहित्यकार तथा कार्यक्रमका संयोजक सूर्यप्रसाद लाकोजू बताएका छन् ।