कोभिडका बारेमा काभ्रे कांग्रेसले मुख खोल्यो

काभ्रे । जिल्ला सचिव दिनेश लामाले विज्ञप्ति जारी गर्दै कोभिडका बारेमा नेपाली कांग्रेस काभ्रेको धारणा सार्वजनिक गरेको छ ।

जनताको स्वास्थ्यप्रति उदासिन नबन्न सरकारलाई आग्रह गरेको छ । पार्टीका जिल्ला सचिव दिनेश लामाले एक प्रेस विज्ञप्ति जारी गर्दै यस्तो आग्रह गरेका हुन् ।

‘दोश्रो चरणको कोभिड–१९ को महामारी दिनानुदिन बढ्दै गएको छ । दैनिक हजारौको संख्यामा कोभिडका विरामीहरु बढ्दै गएका छन् । विरामीहरुको लागि अत्यावश्यक अक्सिजन, भेन्टिलेटर, आईसियु बेड लगायत औषधीको अभाव बढेको छ ।’ विज्ञप्तिमा भनिएको छ, ‘अक्सिजन नपाएर विरामी छट्पटाएर मर्नु परेको, अस्पतालमा बेड नपाएर र अस्पतालको बेडको खोजी गर्दागर्दै एम्बुलेन्समा नै विरामीले मृत्युवरण गर्नु परेको जस्ता दर्दनाक परिस्थिति सृजना भएको छ । यस्तो परिस्थितिमा नेपाल सरकार कोभिड रोकथाम तथा नियन्त्रण र विरामीको उचित उपचारमा भन्दा संघदेखि प्रदेशसम्मको सत्ता जोगाउने तिकडम, औषधी तथा खोप खरिदमा कमिसनको खेलोमेलो जस्ता घृणित कार्यमा व्यस्त छ । सरकारको यस्ता घृणित तथा जनताको स्वास्थ्यप्रतिको उदासिन कार्यको जति निन्दा गरेपनि पर्याप्त हुँदैन ।’

महामारीको बेलामा विवाह तथा ब्रतवन्ध जस्ता भिडभाड हुने कार्यको लागि प्रशासनले दिएको छुट उचित नभएको भन्दै त्यसको लागि प्रशासनको ध्यानाकर्षण समेत गराएको विज्ञप्तिमा उल्लेख छ ।