अग्रपंक्तिमा रहने सञ्चारकर्मीका लागि राहत

बिपशना शाक्य

काभ्रे । समग्र सञ्चारकर्मीहरुको मर्मलाई आत्मसाथ गर्दै प्रेस संगठन नेपाल काभ्रे शाखाले स्वास्थ्य सामग्रीको साथमा खाद्यान्न वितरण गरेर उदाहरणीय कार्यको नमूना पेश गरेको छ ।
प्रेस संगठन नेपालका अग्रज सञ्चारकर्मीहरुको उपस्थितिमा जिल्लामा क्रियाशील सञ्चारकर्मीहरुको पहलमा जिल्लास्थित विभिन्न व्यवसायी, संघसंस्थाहरुको सक्रियतामा उक्त राहत सामग्री सञ्चारकर्मीहरुलाई वितरण गरिएको थियो ।
काभ्रेमा प्रेस संगठन नेपालले जिल्लाबाट विभिन्न सञ्चारमाध्यममा कोरोना प्रभावको वेलामा पनि अग्रपंक्तिमा रहेर काम गर्ने पत्रकारहरुलाई सहयोग स्वरुप स्यानिटाईजर, मास्क, क्याल्सियम, जिंक चक्की र साबुन लगायतका स्वास्थ्य सामग्री वितरण भएको संगठनका उपाध्यक्ष रोजन तामाङले बताउनुभएको छ । मुलुकमा हुने प्रत्येक घटनाहरुमा अग्रपंक्तिमा रहेर काम गर्ने पत्रकारहरका लागि सहज वातावरण बनोस् भन्ने मनशायका साथ जिल्लाका विभिन्न संघ संस्थाको सहयोगमा संगठनले करिब ४५ जना सञ्चारकर्मीहरुलाई सो राहत सामग्री वितरण हस्तान्तरण गरेको बताउनुभएको छ । त्यसैगरी पेशासँग आबद्ध सञ्चारकर्मीहरुमा जो जिल्लाका कुनाकन्दराबाट शहरमा आई पेशालाई मर्यादित बनाउन लागिपरेका छन्, उहाँहरुका लागि खाद्यान्न समेत सो अवसरमा वितरण गरिएको उपाध्यक्ष तामाङले बताउनुभएको छ । जसअन्तर्गत भाडामा बसेर पेशालाई मर्यादित बनाउने १२ जना सञ्चारकर्मीलाई सो अवसरमा खाद्यान्न वितरण गरिएको पनि तामाङले बताउनुभएको छ ।
सो कार्यका लागि खुल्लापोष्ट डटकमका सञ्चालक पत्रकार रामप्रसाद ढकाल (आर.डि. शर्मा) लगायत ईस्क्रा कन्स्ट्रक्सन प्रा.लिका प्रोपाईटर टिका बहादुर तामाङ, दीप लक्ष्मि एग्रीगेट एण्ड मिनिङ प्रा.लि, सहकारीकर्मी राजन अधिकारी, व्यवसायीहरु कृष्णहरी आचार्य, प्रेम चौलागाई, विकास खनालको सहयोगमा राहत सामग्री जुटाइएको प्रेस संगठन नेपाल काभ्रे शाखाले जनाएको छ ।