साताको मुक्तक

दुर्गा बुलबुल श्रेष्ठ
धादिङ

१.
खुशी अनि आँसु मिसाइ अँजुली भरिको माया
थाप्छौ ? हत्केला फिंजाइ अँजुली भरिको माया
पूरै जिन्दगी सुम्पिन सक्छु कदापी भन्दिन मैले
तर दिन मन छ तिमीलाई अँजुली भरिको माया ।

२.
कसैको यो अनि कसैको त्यो के फरक पर्छ
नभने हुँदैन र ?अर्का आफ्नो के फरक पर्छ
अनुचित कार्य गर्दै हिड्ने चाहे जोसुकै होस्
लाइदिंदा छिटपुट कालोमोसो के फरक पर्छ ।

३.
पीडाले मन गाँठो परि रुँदै गरेको आँखा
बनाएर आँसु गह भरि रुँदै गरेको आँखा
झुट हाँसो देखाउन सक्छ बरु ती ओठले
झुट हुन सक्छ कसरी रुँदै गरेको आँखा ।

४.
कुन ब्यहोरा बढेछ झन सुधार भन्दा पनि
कति तिखो वचन काँडेतार भन्दा पनि
रुपले त निक्कै राम्रो देखिने मान्छेको
कुरुप रहेछ नि मन अङ्गार भन्दा पनि ।

५.
राख्न पनि सकिन्न पारेर थला केही गर्न सकिन्न
न त दबाउन नै सकिन्छ गला केही गर्न सकिन्न
आफ्नो लायक नभए बाटो बदल्ने हो आफैंले
भिन्न मानिस भिन्न चर्तिकला केही गर्न सकिन्न ।