मिराज कथा संग्रह लोकार्पण

काभ्रे । साहित्यकार ध्रुबकृष्ण ताम्राकारको मिराज नामक कथा संग्रहको लोकार्पण गरिएको छ । सो कथा संग्रहको लोकार्पण ललित कला प्रज्ञा प्रतिष्ठानका कुलपति तथा कार्यक्रमका प्रमुख अतिथि के.के कर्माचार्य, साहित्यकार सूर्य लाकोजू र कथाकार ध्रुब ताम्राकारले संयुक्त रूपमा विमोचन गर्नुभएको हो ।
कार्यक्रममा बोल्दै प्रमुख अतिथि कर्माचार्यले कथा मिराज कथा संग्रह एक पठनीय कृति भएको बताउनुभयो । एक प्रसंगमा उहाँले कथा समाजका लागि लेखिने भएकोले कथाले समाजमा घट्ने घटनाहरूलाई सजिव ढङ्गले प्रस्तुत गर्नुपर्ने बिचार व्यक्त गर्नु भयो । त्यस्तै साहित्यकार सूर्य लाकोजूले पुस्तकका बारेमा आफ्नो विचार व्यक्त गर्दै कथाहरू पठनीय रहेको बिचार ब्यक्त गर्नुभयो । उहाँले कथाहरू समाजमा भएका वास्तविक घट्नाहरूमा आधारित रहेकाले कथा पढ्दै जाँदा तपाईं हामीले देखेका, भोगेका कुराहरू रहेको आभास मिल्ने बताउनु भयो ।
मिराजमा एघार ओटा कथाहरू संग्रहित छन । कथाहरू यथार्थपरक रहेका छन । सर्जक ताम्राकारको यसभन्दा अगाडि प्रारम्भ र हृदय का उद्गार गरी दुइटा कविता संग्रह, भावनाका उत्सर्ग गीत संग्रह, स्पन्दन मुक्तक सङ्ग्रह र आँसुको कथा कथा सङ्ग्रह प्रकाशित छन ।
कार्यक्रममा साहित्यकार तुयुकाजी ताम्राकार, विजयराम कर्माचार्य, कवि रामसुन्दर देउजा, उद्योग वाणिज्य संघ काभ्रेका अध्यक्ष राजेन्द्र पसक्षे, गीता दाहाल लगायतले मन्तब्य व्यक्त गरेका थिए ।