महामारीजन्य रोगका कारण किसानलाई समस्या हुन दिनौं ः प्रमुख न्यौपाने

काभ्रे । “सबैले सबैलाई चिन्दा रोगले भने कसैलाई चिन्दैन” महामारीजन्य रोग सम्बन्धी अन्तक्र्रियालाई सम्बोधन गर्दै पनौती नगरपालिकाका प्रमुख भिम न्यौपानेले कुनै पनि नगरवासी किसानहरुका लागि महामारीका नाममा समस्याग्रस्त हुन नदिने प्रण गर्नुभएको छ ।
बर्डफ्लु लगायतका महामारीजन्य रोग सम्बन्धि अन्तरक्रियामा उठेका जिज्ञासा सम्बोधन गर्ने क्रममा प्रमुख न्यौपानेले उक्त भनाई राख्नुभएको हो । नगरपालिका हलमा कृषि तथा पशुपन्छी शाखाको आयोजनमा भएको कार्यक्रममा महामारीजन्य रोगबारे सरोकारवालाहरुसंग अन्तरक्रिया गरिएको थियो ।
कार्यक्रममा नगर प्रमुख न्यौपानेले नगर क्षेत्रमा रहेका कुखुरा तथा पन्छीजन्य व्यवशायीले अनिवार्य रुपमा नगरपालिकामा दर्ता हुन अनुरोध गर्नुभएको छ । नगरपालिकामा दर्ता हुदा व्यवशायीहरुको लागि विभिन्न कार्ययोजना बनाउन सकिने र रोगप्रकोप लागेर व्यवशायमा परेको क्षतिमा सहयोग गर्न सहज हुने नगर प्रमुख न्यौपानेले बताउनुभयो । रोग नियन्त्रण गर्न पनि सहज हुने उहाँको भनाई छ ।
नगरपालिकाका प्रमुख प्रशासकीय अधिकृत प्रदिप पौडेलले नगर क्षेत्रमा बेचबिखन हुने पशुपन्छी जन्य मासुको सरसफाईमा पनि ध्यान दिनु जरुरी रहेको औल्याउनुभयो । सरसफाईमा ध्यान नदिदा यसबाट पनि रोगको प्रकोप बाधन सक्ने भन्दै जनस्वास्थ्यलाई मध्येनजर गर्दै नगर क्षेत्रमा एउटा पशु बाधशालको आवश्यकता रहेको बताउनुभयो ।
वरिष्ठ प्रशासकीय अधिकृत इन्द्र अधिकारी, राजकुमार हुमागाईं, सञ्चारकर्मी मधुसुदन गुरागाईं, कृषि तथा पशुपन्छी विकास समितिका संयोजक गुणनाथ सापकोटा लगायतका वक्ताहरुले अन्तक्र्रियामा उठेका जिज्ञासाहरु सम्बोधन गर्दै कृषि शाखाले जुन किसिमको अनुकरणीय कार्य गर्दै आएको छ, त्यसलाई आत्मसाथ गर्दै जाने हो भने पनौती नगर कृषि तथा पशुपन्छीको क्षेत्रमा अब्बल सावित हुने धारणा राखेका थिए ।
भेटरीनरी अस्पताल तथा पशुसेवा विज्ञ केन्द्र धुलिखेलका प्रमुख राजकुमार हुमागाईंले नगर क्षेत्रमा रहेका सबै कुखुरा व्यवशायीलाई सम्पर्कमा आउन आग्रह गर्दै किसानहरु सम्पर्कमा हुदा तथ्यांक संकलन हुने र आवश्यकता परेको बेलामा सहयोग जुटाउन सहज हुने उल्लेख गर्नुभयो । किसानको पिडा आफुले बुझेको बताउदै उहाँले किसानको हितमा गर्नुपर्ने कुनै पनि सहयोग गर्न आफु तयार रहेको बताउनुभयो ।
नेपालमा महामारीजन्य रोग सम्बन्धी कार्यपत्र डा. सुदीप हुमागाईंले प्रस्तुत गर्नुभएको थियो । कब नेपालका प्राविधिक प्रमुख डाक्टर सुदिप केशब हुमागाईंले कुखुरा तथा पन्छीमा लाग्ने विभिन्न रोग र उपचार र मानिसमा पर्ने प्रभावका बारेमा कार्यपत्र प्रस्तुत गर्नुभएको थियो भने नगरमा कृषि तथा पशुपन्छीको अवस्था बारे पशु चिकित्सक मणिप्रसाद सापकोटाले कार्यपत्र प्रस्तुत गर्नुभएको थियो । उहाँले नगरक्षेत्रका पोल्ट्री व्यवसायीहरुलाई कुखुरा तथा पन्छीमा रोग देखा परेमा नलुकाउन आग्रह गर्नुभयो । ‘रोग लुकाऊदा आफ्नो त क्षति हुन्छ नै आफ्नो क्षेत्रका अन्य पोल्ट्री ब्यवसाय पनि सखाप हुन्छ, समयमै कृषि तथा पशुपन्छी शाखामा खबर गरे नगरपालिकाले केहि सहयोग गर्न सक्छ’ उहाँले भन्नुभयो । नेपालमै पहिलो पटक काभ्रेमा ब्रोइलर चल्लाको माउ उत्पादन गर्न कब नेपालले ग्रान्ड प्यारेन्ट फर्म स्थापना गरिसकेको र अब ब्रोइलर चल्लाको माउ विदेशबाट किनेर ल्याउनुपर्ने झन्झट नहुने प्रमुख सापकोटाले जानकारी दिनुभयो ।
कुखुरा तथा पन्छीजन्य पोल्ट्री व्यवशायमा बर्डफ्लु लगायतका महामारीजन्य रोग कसरी सर्छ र यसबाट हुने क्षती न्यूनीकरण तथा नगरपालिकाले गर्न सक्ने सहयोगका विषयमा छलफल भएको थियो ।