सकारात्मक पक्ष ओझेलमा राख्न कर्मचारीले नै भूमिका खेले ः मन्त्री यादव

काठमाडौं । किसानहरुका समस्या मध्येको जटिल समस्याको रुपमा रहेको रासायनिक मलको सहजतालाई लिएर चर्चा कमाउन सफल कृषि तथा पशुपन्छी विकासमन्त्री महेन्द्रराय यादवले सरकारी स्वमित्वको दुग्ध विकास संस्थान (डीडीसी) सुधार गर्न गठन गरेको समितिले अध्ययन प्रतिवेदन लुकाएको बताउनुभएको छ ।
सञ्चारकर्मीहरुको भेटलाई सम्बोधन गर्ने क्रममा मन्त्री यादवले मंगलबार उक्त गुनासो राख्नुभएको हो । आफूले किसानहरुका पक्षमा केही गर्न खोज्दा कर्मचारीहरुबाट आवश्यकता बमोजिम सहयोग नपाएको धारणा राख्नुभएको छ । यसको मुख्य दोष अरु कोहि नभएर आफ्नै मन्त्रालय भित्रका उच्च पदस्थ कर्मचारी रहेको मन्त्रीको दाबी छ ।
सरकारले दुग्ध विकास संस्थानको गुणस्तर र बजारीकरण, प्रशासनिक र आर्थिक समस्याहरु केलाएर प्रतिवेदन दिन भने पनि कर्मचारीले नटेरेको मन्त्री यादवको भनाइ छ । यही अवस्थामा रहे डीडीसी डुब्नेछ । यसलाई कसरी सुधार गर्न सकिन्छ भनेर अध्ययन गरी प्रतिवेदन पेश गर्न भनेको तीन महिना भयो, कागजात लुकाए कोही आएनन् मन्त्री यादवले पत्रकारहरुको भेटमा भन्नुभएको छ ।
निजी क्षेत्रका अन्य डेरीहरु नाफामै हुँदा पनि सरकारी स्वमित्वको डीडीसी भने किसानको भुक्तानी गर्नसमेत नसक्ने अवस्थामा पुगेको मन्त्री यादवको भनाइ छ । सरकारले नगद दिएर मात्रै डीडीसी चल्ने अवस्था अन्त्य गर्न आफूले चाहेको र त्यसैका लागि अध्ययन गर्न भनिए पनि आफूलाई असहयोग भएको मन्त्री यादवले उक्त अवसरमा दुःखेसो पोख्नुभएको छ ।
यता मन्त्रीको भनाइसँग असहमत राख्दै दुग्ध विकास संस्थानको समस्या पहिचान गरेर प्रतिवेदन पेश गर्न बनाइएको समितिका संयोजक सेवा निवृत्त भएका कारण प्रतिवेदन बनाउन केही समय लाग्ने पशुपन्छी विकास मन्त्रालयका सचिव निरु दाहालले बताउनुभएको छ । डीडीसी सुधार कार्यादलका संयोजक एवम् मन्त्रालयका सहसचिव लोकनाथ पौडेल सेवा निवृत्त भएका कारण प्रतिवेदनले पूर्णता नपाएको उहाँको जिकिर थियो ।