गजल

आवाज शर्मा “बाला”
अन्नपूर्ण १, कास्की

कसैले हाँगो हल्लायो झरे सारा रहर शायद
अझै पाक्ने प्रतीक्षामा थिए काँचा रहर शायद

रहरको भीडमा बाठा चढेका छन् अरूमाथि
त्यहीं पिल्सेर मर्दैछन् सिधासादा रहर शायद

हिजो मात्रै डढेलोमा रहर आधा जलेका हुन्
मलामी भै गएका छन् अरू आधा रहर शायद

सबै अलमल भएका छन्, हराएको नपाए झैं
हुरीमा धूल उड्दा झैं उडे सबका रहर शायद

जो आफ्नो हैन उसकै आश यो मनमा छ यस्तो कि
रहरकै टेकोले थाम्ने न हो ढल्दा रहर शायद