प्रभातफेरी अनलाइन१२ पटक पढिएको | मंसिर १, २०८३ | मंगलबार
काठमाडौं / नेपालको सार्वभौम साख मूल्यांकन (सोभरेन क्रेडिट रेटिङ) अंक गत वर्षको तुलनामा वृद्धि भएको छ। अन्तर्राष्ट्रिय रेटिङ संस्था फिचको मूल्यांकनअनुसार नेपालको अंक ३.४७ बाट बढेर यस वर्ष ३.६६ पुगेको हो।
अर्थ मन्त्रालयका अनुसार फिचको सोभरेन रेटिङ मोडल (एसआरएम) मा नेपालको अंक गत वर्षको तुलनामा ०.१९ अंकले सुधार भएको हो। फिचको मूल्यांकन प्रणालीमा ‘बीबी–’ (डबल बी माइनस) रेटिङ प्राप्त गर्न न्यूनतम ३.५ अंक आवश्यक पर्ने व्यवस्था छ।
गत वर्ष नेपालको एसआरएम अंक न्यूनतम सीमाभन्दा कम रहे पनि गुणात्मक मूल्यांकनका आधारमा एक तह थप गरी ‘बीबी–’ रेटिङ प्रदान गरिएको थियो। तर, यस वर्ष कुनै अतिरिक्त ग्रेस अंक वा सहुलियतबिना आफ्नै मूल्यांकन अंकका आधारमा नेपालले उक्त रेटिङ प्राप्त गरेको अर्थ मन्त्रालयले जनाएको छ।
फिच रेटिङले नेपालको सार्वभौम क्रेडिट रेटिङ लगातार तेस्रो वर्ष ‘डबल बी माइनस’ अर्थात् ‘बीबी–’ स्तरमा कायम राखेको छ।
रसुवा, बूढीगण्डकीलगायत क्षेत्रमा गएको विनाशकारी बाढीबाट उत्पन्न प्रतिकूल परिस्थितिका बाबजुद नेपालको क्रेडिट रेटिङ अंकमा वृद्धि हुनु महत्वपूर्ण उपलब्धि भएको अर्थ मन्त्रालयको भनाइ छ।
सरकारले अघि बढाएका सुशासनसम्बन्धी कदम तथा समग्र आर्थिक सुधारका कार्यक्रमले नेपालको सार्वभौम क्रेडिट रेटिङमा सकारात्मक प्रभाव पारेको मन्त्रालयद्वारा जारी विज्ञप्तिमा उल्लेख छ।
सार्वभौम क्रेडिट रेटिङले कुनै देशको आर्थिक अवस्था, वित्तीय स्थायित्व तथा ऋण दायित्व पूरा गर्न सक्ने क्षमताको मूल्यांकन गर्दछ। यसले अन्तर्राष्ट्रिय वित्तीय बजारमा मुलुकको विश्वसनीयता, वैदेशिक लगानीको वातावरण तथा बाह्य ऋण प्राप्त गर्ने क्षमताको आकलन गर्न महत्वपूर्ण आधार प्रदान गर्दछ।