व्यक्तित्व विकासको लागि उद्घोषण तालिम

बनेपा-काभ्रेपलाञ्चोक जिल्ला बहुउद्देश्यीय सहकारी संघले आफ्ना सदस्यहरुको व्यक्तित्व विकासको लागि उद्घोषण तालिम दिएको छ । जसले गर्दा कुनैपनि सभा सम्मेलन वा बैठकहरुमा समेत आफ्नो बिचार व्यक्त गर्न सहज हुनेभएको छ ।

कार्यक्रममा अध्यक्ष विद्यान जोशीले सहकारी क्षेत्रमा कृयाशिल ब्यक्तिहरूको क्षमता विकास सँगै सार्वजनिक भाषणसँगै उद्घोषण सम्वन्धी कला सिकाउन तालिमको आयोजना गरेको बताउनु भयो । पब्लिक सुत्रधार बहुउद्देश्यीय सहकारी संस्था, उग्रतारा, भोमी बहुउद्देश्यीय, ज्योती बहुउद्देश्यीय, ओम शान्ति बहुउद्देश्यीय, सिद्धार्थ बहुमुखि, लक्षित बहुउद्देश्यीय, संगम नारी चेतना बहुउद्देश्यीय, माछापुच्छे बहुउद्देश्यीय, धुलिखेल बहुउद्देश्यीय सहकारी संस्था समेतकोे सह आयोजना तालिम सम्पन्न भएको थियो ।

संघका प्रथम उपाध्यक्ष एवं उग्रतारा बहुउद्देश्यीयका प्रवन्धक कृष्णभक्त थापाको संयोजकत्वमा सम्पन्न तालिममको समापन कार्यक्रममा राष्ट्रिय सहकारी बैंकका अध्यक्ष के.बी उप्रेति, पुर्व मिस नेपाल सदिक्षा श्रेष्ठ, काभ्रेपलाञ्चोक जिल्ला बचत तथा ऋण सहकारी संघका संचालक सदस्य सागर कपाली लगायतले तालिमको बारेमा आ—आफ्नो धारणा राख्नुु भएको थियो । स्वागत मन्तव्य संघका सदस्य एवं सिद्धार्थ बहुमुखी विदुरप्रसाद घिमिरेले साथै कार्यक्रम सञ्चालन संघ सचिव योगराज दाहालले गर्नुभएको थियो । सहभागि सहकारीहरुबाट पदाधिकारी तथा कर्मचारी गरी ३७ जना सहभागि हुनुभएको थियो । सहभागिहरुलाई चर्चित रेडियोकर्मी शुभराज अधिकारीले तालिम दिनुभएको थियो ।