नेवा–ताम्सालिङको पक्षमा लागिरहन्छु –सांसद ढकाल

आर.एल.श्रेष्ठ
बनेपा-सांसद रत्न ढकालले सदनमा आफू एक्लै भएपनि नेवा–ताम्सालिङ राज्यको लागि निरन्तर रुपमा लागि रहने बताउनु भयो ।
फोनिज काभ्रे र तामाङ पत्रकार संघ, काभ्रेको संयुक्त आयोजनामा सम्पन्न ‘प्रदेश ३ को नामकरणः प्रस्तावित नेवा–ताम्सालिङ’ विषयक अन्तरकृया कार्यक्रमका प्रमुख अतिथि सांसद ढकालले उक्त कुरा धारणा राख्नु भएको थियो । प्रदेश ३ को नामकरण नेवा–ताम्सालिङ राख्दा यहाँका अन्या जाति समुदायले कुनै पनि दमन खेप्नु नपर्ने ठोकुवा गर्नु भयो ।

कार्यक्रममा सांसद ढकालले थप्नुभयो ‘सदनमा म एक जना मात्र भए पनि नेवा–तामसालिङ छोडिन्न । अन्तिमसम्म यसको विषयमा बहस गरेर अगाडि बढ्ने छु ।’ यो प्रदेशको नाम नेवा–ताम्सालिङ हुँदा दमन खेप्नु नपर्ने बताउंदै प्रदेश ३ बाट संविधानमा व्यवस्था भएबमोजिमको नामकरण गरेर देखाउन अगाडी बढ्दा निकै कठिन भएको बताउनु भयो । संघीयतालाई बलियो र बजबुत बनाउने हो भने पहिचानको आधारमा नामकरण गरिनुपर्ने उहाँको धारणा थियो । संघियता आयो भने मुलुक टुक्रिने त होइन ? अनि अर्को राजतन्त्रले मात्र राष्ट्रिय एकता कायम गर्छ भन्ने पनि थियो तर ‘संघियतालाई बलियो बनाउनका लागि हामी लागिरहेका बताउनु भयो ।

प्रदेशको राजधानी जसरी भएपनि काभ्रेमै ल्याउने प्रयत्न भएको बताउंदै काभ्रे बाहेक अरु ठाउँमा राजधानी बनाउने पार्टीले व्हीप जारी गरे व्हीप तोड््ने बताउनु भयो । ‘संघियताको मूल मर्म जनतालाई दुःख दिनु हो र ? सिह दरबर खोज्न दोलखाको मान्छे हेटौंडा खोज्न जाने ।’ उनले भने, ‘बरु ह्विप तोड्छौं काभ्रे बाहेकको लागि राजधानी मानिन्न । नेतृत्वको ह्विप मान्दैनौं । फरक ढंगले प्रस्तुत हुन्छौं ।’ पछिल्लो समयमा मुख्य मन्त्री डोरमणि पौडेलले दिएको अभिव्यक्ति प्रति आक्रोशित हुँदै सांसद ढकालले कुतर्क नगर्न मुख्यमन्त्रीलाई अनुरोध गर्नुभयो । फोनिजको २० औं स्थापना दिवस तथा २५ औं तामाङ प्रसारण दिवसको अवसर पारी कार्यक्रमको आयोजना गरिएको थियो ।