”बालमैत्री नगर हुन गर्भवती महिला पनि स्वस्थ हुनुपर्छ – न्यौपाने; “निःशुल्क स्वास्थ्य प्रयोगशालाको सुविधा

पनौती-गत बुधबार पनौती नगरपालिका वडा नं. ८ को सक्रियता वडाभित्र रहेका गर्भवती महिलाहरुका लागि लक्षित गरी अण्डा वितरण कार्यक्रमलाई सम्बोधन गर्दै नगर प्रमुख भिम न्यौपानेको कथन थियो– बालमैत्री नगर हुन गर्भमा भएको शिशु पनि स्वस्थ हुनुपर्छ । जब गर्भबाटै स्वस्थ शिशु जन्मन्छ तब मात्र बालमैत्रीको कल्पना पूरा गर्न सकिन्छ । त्यसैले आज जुन अभियान अगाडि बढेको छ, त्यो एउटा सूचक मात्रै हो । यो नै सबथोक होइन, यसलाई माध्यमका रुपमा लिइदिन गर्भवती महिलाहरुलाई आग्रह गर्दै सुरक्षित प्रसुति गराउन प्रत्येक गर्भवती महिलाले स्वास्थ्य संस्थालार्य सम्झिनुपर्ने छ । यदि यति मात्रै गर्न सक्यौं भने पनि पनौती नगरको चाहना पूरा हुनेमा आफू आशावादी रहेको नगरपिता न्यौपानेले खुलासा समेत गर्नुभयो ।

कार्यक्रममा प्रमुख प्रशासकीय अधिकृत हरिप्रसाद चापागाईं– गर्भवती जाँच तथा अण्डा वितरण कार्यक्रम बालमैत्री स्थानीय शासन स्थापना गर्न कोशेढुंगा सावित हुनेछ । स्वच्छ, बच्चा जन्माउनका लागि यस किसिमका क्रियाकलाप सार्थक हुन्छन् । पौष्टिक तत्व बिना शिशुको बुद्धि विकास सम्भावना रहँदैन । त्यसका लागि पनि यो अभियान अत्यन्तै व्यवहारिक छ भन्नुहुँदै अण्डासँगै घरभित्रै पाइने दुध, दही, फलफूल, सागपात लगायतका खानालाई नियमित खान गर्भवती महिलाहरुलाई चापागाईंले आग्रह समेत गर्नुभयो ।

कार्यक्रममा वडा अध्यक्ष केशव बञ्जाराले वडाबाट प्रदान गरिने सेवाहरुमा कुनै कमी हुन दिने छैनौं भन्दै स्वास्थ्य चौकीमा नियमित जाँच गर्न आउनुहुने गर्भवती महिलाको निःशुल्क रगत, परिक्षण सहित पोषण खानपानको व्यवस्था समेत गरिने बताउनुभयो । पूर्व वडा अध्यक्ष वेदनप्रसाद बञ्जारा, वडा सचिव भगवान् बस्नेत, वडा सदस्य शोभा कार्की लगायतका वक्ताहरुले अण्डाको महत्व र प्रभावकारिताका बारेमा चर्चा गर्नुभएको थियो । कार्यक्रमको संयोजन सहजकर्ता गिता थापाले गर्नुभएको थियो ।