तथाकथित राष्ट्रवाद भनेर नामाकरण गरिनु न्याय संगत नहुने -प्रम

गंगा लामा
काठमाण्डौ-मंगलबार प्रधानमन्त्री केपी शर्मा ओलीले नीति तथा कार्यक्रमका बारेमा सांसदहरुद्वारा उठाइएका सवालहरुको जिज्ञासा मेट्ने क्रममा भारतको अतिक्रमणमा परेका नेपाली भूभाग कालापानी, लिम्पियाधुरा र लिपुलेक लगायतका भूभाग फिर्ता ल्याउने प्रतिबद्धता जाहेर गर्नुभएको छ ।

प्रधानमन्त्री ओलिले सरकारले अतिक्रकणमा परेको नेपाली भूभाग फिर्ता ल्याउने निर्णय गर्दै आवश्यक कुटनीतिक कदम चालेको औपचारिक जानकारी समेत सदनलाई गराउनुभएको थियो । प्रधानमन्त्री ओलिले सोमबारको मन्त्रीपरिषद् बैठकले नेपाली भूमि समेटेर नक्सा पारित गरेको र केही दिनभित्र सार्वजनिक गरिने पनि सो अवसरमा जानकारी गराउनुभएको थियो ।

प्रधानमन्त्री ओलिले नेपाली भूमि फिर्ता ल्याउने सरकारको निर्णयबाट सिङ्गो राष्ट्र खुशी हुने विश्वास लिएको भन्दै उहाँले नयाँ नक्सा अनुसारको व्यवस्था गर्दै संविधानको अनुसूची ३ संशोधन भएको दिन नेपालमा दीपावली गरिने उद्घोष समेत गर्नुभएको थियो । संविधानको अनुसूची ३ संशोधन गर्न संविधान संशोधनको प्रस्ताव प्रस्तुत गरिने, त्यो प्रस्ताव पारित हुने विश्वास आफूले लिएको पनि प्रधानमन्त्रीले स्पष्ट पार्नुभयो ।

नेपाली भूभाग फिर्ता ल्याउने सरकारको निर्णयका बारेमा तथाकथित राष्ट्रवाद भनि टिप्पणी गरिएको उल्लेख गर्दै उहाँले भन्नुभयो “तथाकथित राष्ट्रवाद भनेर नामाकरण गरियो । विशेषण दिईएको पनि सुनियो । म साथीहरुलाई आग्रह गर्न चाहन्छु । नेपालजस्तो देशले जो दुईवटा ठूला बलिया देशहरुको बीचमा छ । यस्तो देशले तथाकथितका राष्ट्रवादको बाटो, देखावाला राष्ट्रवादको बाटो अथवा लम्पसारवादको बाटो राष्ट्रवाद नहुने बाटो समाउन हुँदैन प्रधानमन्त्रीले भन्नुभयो ।