पत्रकारदेखि प्रजिअसम्म संक्रमित

धुलिखेल । जिल्ला प्रशासन कार्यालय काभे्रका प्रमुख जिल्ला अधिकारी शिवराम पोखरेल लगायत जनप्रतिनिधि र सञ्चारकर्मी समेत कोभिड संक्रमितमा रहेको जिल्ला स्वास्थ्य कार्यालय काभ्रेले पुष्टि गरेको छ ।
प्रमुख जिल्ला अधिकारी संक्रमित भएपश्चात् जिल्ला प्रशासन कार्यालयबाट प्रवाह गरिने सेवाहरु एक हप्ताको लागि स्थगित गरिएको छ तर जिल्ला प्रशासनबाट गर्नुपर्ने अति आवश्यक कार्य भने नरोकिने जिल्ला प्रशासन कार्यालयद्वारा एक विज्ञप्तिमार्फत् उक्त जानकारी गराएको छ । विज्ञप्तिमा उल्लेख गरिएअनुसार कार्यालयमा रहेका अन्य कर्मचारीहरुलाई समेत कोरोनाको मिल्दोजुल्दो लक्षण देखिएकोले कार्यालयबाट नियमित हुने कार्यलाई स्थगित गरेको जानकारी गराइएको छ ।
विज्ञप्तिमा उल्लेख गरिएअनुसार कोरोना पुष्टी भए लगतै प्रजिअ सुरक्षीत ढंगबाट होम आईसोलेसनमा रहनुभएको छ । हिजो (मंगलबार) देखि कार्तिक २४ गते सोमबारसम्मका लागि कार्यालयबाट हुदै आएको नियमित सेवाहरुलाई स्थगित गरेको सहायक प्रमुख जिल्ला अधिकारी लक्ष्मीदेवी हुमागाई (खतिवडा) ले हस्ताक्षर गरी जारी गर्नुभएको विज्ञप्तिमा जनाएको छ ।
यसैगरी राजनीतिक व्यक्तित्व नेपाली कांग्रेसका केन्द्रीय सदस्य एवं पूर्व जिल्ला सभापति शिवप्रसाद हुमागाईं, जिल्लामा क्रियाशील सञ्चारकर्मी, जनप्रतिनिधिहरु समेत संक्रमित हुन पुगेका छन् । पछिल्लो जानकारी अनुसार पत्रकार महासंघका पूर्व अध्यक्ष नारायण सापकोटा, जनप्रतिनिधि बेथानचोक गाउँपालिकाका अध्यक्ष प्रेमबहादुर तिमल्सिना, लगायतमा संक्रमण देखिएको कारण उहाँहरु होम आइसोलेशनमा रहेको जिल्ला स्वास्थ्य कार्यालय काभ्रेले जनाएको छ ।
यता पनौती नगरपालिकाका नगर प्रमुख भीम न्यौपानेले कोरोनालाई पराष्त गर्नुभएको छ । मंगलबार जिल्ला स्वास्थ्य कार्यालयले दिएको जानकारी अनुसार प्रमुख न्यौपानेको पिसिआर रिपोर्ट नेगेटिभ आएको छ । नेगेटिभ रिपोर्टसँगै नगर प्रमुख न्यौपानेले कार्यपालिकाको जिम्मेवारीलाई छिट्टै निरन्तरता दिने जानकारी गराउनुभएको छ ।