जनताका माझ घोषणा गरिएका कार्यक्रमहरु क्रमशः सम्बोधन हुँदै जानेछन् -सांसद दोङ्ग

खुबनाथ दुलाल
खानीखोला/काभ्रे जिल्लाको कर्णाली भनेर वर्णन गरिने खानीखोला गाउँपालिका वडा नं. ६ ले गाउँपालिकामा सञ्चालित योजनाहरुका बारेमा सार्वजनिक सुनुवाइ गरेर गाउँवासीलाई सुसूचित गर्ने काम गरेको छ ।

गाउँपालिकाको देउरालीमा भएको सार्वजनिक सुनुवाइ, समिक्षा तथा बिकास निर्माणमा आगामी योजना सम्बन्धी अन्तरक्रिया कार्यक्रम भएको छ । उक्त अन्तरक्रियामा स्थानीय जनता र जनप्रतिनिधिबीच संवाद भएको थियो । वडा नं. ६ मा पर्ने साविक सबै वडाका जनताको सहभागीता रहेको उक्त कार्यक्रमलाई संघीय सांसद गंगाबहादुर दोङ (बमध्वज) ले निर्वाचनको क्रममा आफू र आफ्नो पार्टीले जनतासमक्ष गरेको प्रतिबद्धता विस्तारै पूरा गर्दै जाने उद्घोष गर्नुभएको थियो । कार्यक्रममा थप सम्बोधन गर्ने क्रममा सांसद दोङ्गको कथन थियो– हामीले मुख्यतयाः यहाँको पहिलो आवश्यकता र समस्यालाई सम्बोधन गर्ने भनेका थियौं । सोही अनुसार काम अगाडि बढीरहेको छ । हामीले खोपासी तालढुंगा सडक निर्माण सम्पन्न गर्ने भनेका थियौं, आज तालढुंगामा गाडी आइपुगेको छ । विद्युतको राष्ट्रिय लाइन विस्तार गरेर विद्युतिकरणको कामलाई अगाडि बढाउँछौं भनेका थियौं, सो काम धमाधम भइरहेको छ । च्याल्टी, दयागाउँ, तालढुंगा सडक निर्माण गर्ने भनेका थियौं, यो पनि अन्तिम चरणमा पुगेको छ । यसैगरी सांसद दोङ्गले खोपासी तालढुंगा सडक अब स्तरोन्नति द्रुत रुपमा हुनेछ । यो सडक राजनीतिक सडक हो, अब कुनै पनि मूल्यमा यसको स्तरोन्नतीका साथमा ग्राबेल र पिच हुनेछ । डाँडापारीका जनताले अब ढुक्कसँग बाह्रै महिना गाडी चढ्न पाउनेछन् ।

सम्बोधनकै क्रममा सांसद दोङ्गको टिप्पणी थियो– केही विरोधीहरुले कम्युनिष्ट सरकार र सांसदले केही पनि गरेन भन्ने भ्रम फैलाईरहेकोले यस्तो भ्रमको पछि नलाग्न जनतालाई अनुरोध समेत गर्न पछि पर्नुभएन । केही मान्छेहरु भ्रमको खेती गर्न तल्लिन भएको आफूले महसुस गरेको भन्दै वर्तमान सरकार र सांसदले केही पनि गरेन भनेर भ्रम फैलाएको पाइएको छु । तपाईं नागरिकहरु यस्तो भ्रमको पछि नपर्नुहोला भन्न समेत सांसद दोङ्गले कार्यक्रममा भ्याए । हामीले केही पनि नगरेको भए खोपासी तालढुंगामा गाडी कसरी पुग्यो ? विद्युतिकरणको काम तिब्र गतिमा कसरी भइरहेको छ ? हरेक बस्तीमा सडक सञ्जाल कसरी पुग्यो ? खानेपानीको ठूलो–ठूला योजना कसरी कार्यान्वयन हुँदै छन् ? बुझ्न जरुरी भएको सांसद दोङ्गको टिप्पणी थियो ।

हिजोको एउटा गाविस आज एउटा वडामा परिणत भएको छ । हिजो मुस्किलले २० लाख बजेट हुने गरेको बताउँदै उहाँले आज ३ करोड भन्दा बढी बजेट आएको बताए । हिजो मुस्किलले साल्धारा गाबिसमा जो आज ६ नं. वडा छ २० लाख बजेट आउँथ्यो तर आज यो वडालाई ३ करोड बजेट आएको छ । संघियताले जनताको करेसामा बिकास ल्याएको चर्चा गर्नुहुँदै सांसद दोङ्ग थप्छन्– आज हामी कुन ठाउँमा रहेका छौं, आगामी दिनहरुमा जनताको माग र आवश्यकता बमोजिम आफू सधैं लागिपर्ने प्रतिबद्धता समेत जाहेर गर्नुभएको थियो ।

उक्त कार्यक्रममा संविधान सभा सदस्य तथा नेकपा वागमती प्रदेश कमिटी सदस्य रामहरि सुवेदीले विभिन्न समस्या आएपनि विकास निर्माण सन्तोषजनक रहेको बताए । समस्याहरु धेरै आउँछ, आएको पनि छ, तर विकास निर्माण सन्तोषजनक रहेको छ । सभासद् सुवेदीले भन्नुभयो– यहाँको जनप्रतिनिधले गर्व गर्न लायकको काम गरेका छन्, हामी हल गोरु हौं, जोतिन्छौं, तपाईंको साथ र सहयोग चाहिन्छ ।

सुवेदीले थप्नुभयो– जनप्रतिनिधि विकासको इन्जीन भएको बताउँदै व्यवसायीक शिक्षामा जोड दिए । विकासको इन्जीन भनेको जनप्रतिनिधि हो । कर्मचारी हो, प्राविधकहरु हो । जनताको कुराहरु हो । उहाँले भन्नुभयो– अब व्यवसायीक शिक्षाको आवश्यकता छ । अब विकास तपाईंहरुको हातमा छ ।

उक्त कार्यक्रमलाई सम्बोधन गर्दै गाउँपालिका अध्यक्ष कृष्णबहादुर खुलालले तिखो टिप्पणी गर्दै “खुट्टा तान्नेहरु धेरै भएपनि आफूहरु सफल हुँदै गएको बताएका छन् । खुट्टा तान्नेहरु धेरै छन्, तैपनि हामी सफल भएका छौं ।” बिकास निर्माणका बिषयमा हामीलाई सल्लाह सुझाव दिनु होला अध्यक्ष खुलालले थप्नुभयो । अब यो वर्ष योजना कार्यन्वयनमा ढिलाई भएको छ तर हामी उपभोक्ता समिति चाँडै गठन गरेर अगाडि बढ्ने छौं ।

निकट भविष्यमै डाँडापारी क्षेत्रलाई दुरसञ्चारको पहुँचमा सहज रुपमा जनतासम्म पु¥याउन फोर्जी ल्याउन लागेको बताउँदै त्यसको लागि डाँडागाउँ र असनचुलिमा टावर निर्माण गर्ने जानकारी समेत अध्यक्ष खुलालले कार्यक्रममा गराउनुभयो ।

कार्यक्रममा वडा अध्यक्ष तथा गाउँपालिकाका प्रवक्ता मानबहादुर गोलेले वडा भित्र सम्पन्न भएको र चालु योजनाहरुको बारेमा चर्चा गरेका थिए । वडामा व्यवसायीक कफि खेतीलाई प्रबद्र्धन गर्न लागेको बताए । यो वर्ष मात्रै वडाका किसानहरुले ३ करोड रुपैयाँ बराबरको कफि उत्पादन गरेकोले अब यसको प्रवद्र्धनको लागि १ लाख विरुवा उत्पादन गरेर किसानहरुलाई वितरण गर्न लागेको बताए ।

वडामा बृहत खानेपानी योजना पनि कार्यन्वयन हुन लागेको जानकारी दिनुभएको थियो । ४ सय ५० घरधुरीको लागि खानेपानीको व्यवस्था गर्दै छौं । करिब ९ करोड रुपैयाँको यो योजना शुरु भइसकेको छ । वडा अध्यक्ष गोलेले भन्नुभयो– यो वर्ष ६ करोड रुपैयाँको काम हुँदै छ ।

वडा अध्यक्ष गोलेले एकीकृत छ्याङछ्याङ खोला खानेपानी योजनालाई सम्पन्न बनाउन सबैमा आग्रह समेत गर्नुभएको थियो । कार्यक्रममा नेकपा जिल्ला कमिटी सदस्य दैवलाल घिसिङ, गाउँपालिका उपाध्यक्ष रुकमिनी गुरुङले पनि मन्तव्य राख्नुभएको थियो ।

वडा अध्यक्ष गोलेको सभापतित्वमा भएको कार्यक्रममा प्रमुख प्रशासकीय अधिकृत मोहनलाल श्रेष्ठ, राष्ट्रिय युवा संघ नेपालका जिल्ला सदस्य बिरेन ब्लोन, कार्यपालिका सदस्य निलबहादुर पहरी लगायतले कार्यक्रमको बारेमा चर्चा गरेका थिए । वडा सदस्य राधिका बिकले स्वागत गरेको उक्त कार्यक्रमको सञ्चालन वडा सचिव रेशम थापाले गरेका थिए ।