कांग्रेसको क्षेत्रीय पार्टी कार्यालय कोभिड उपचारमा प्रयोग गर्न दिईने ः तिर्थ लामा

काभ्रे । कोभिडले मुलुकलाई आक्रान्त बनाइरहेको अवस्थामा राजनीतिक पार्टीहरुको समेत चासो बढेको पाइन्छ । सत्ताको विपक्षमा रहेको नेपाली कांग्रेस काभ्रेले नमोबुद्ध नगरपालिका नौबिसेमा रहेको क्षेत्रीय पार्टी कार्यालयलाई आईसोलेसन सेन्टर बनाउन दिने भएको छ ।

उक्त कुराको जानकारी संविधान सभा सदस्य पूर्व सांसद प्रतिनिधि सभा क्षेत्रीय सभापती तिर्थ लामाले गराएका हुन् । कोरोना भाईरसले जिल्लामा पछिल्ला दिन संक्रमित र मृतकको संख्या वृद्धि भएको र उपचार अभावमा कसैले पनि ज्यान गुमाउन नपरोस भन्ने उद्देश्य अनुरुप पार्टी कार्यालयलाई आईसोलेसन बनाउन दिने बताएका छन् । उहाँले निर्माणाधिन पार्टि कार्यालयलाई मर्मत गरी स्थानिय सरकारले प्रयोग गर्न चाहेमा तत्काल प्रयोग गर्न दिईने बताएका छन् ।

‘काभ्रे जिल्लामा भएका अस्पतालहरुले मात्रै कोभिडका बिरामी धान्न सक्ने अवस्था छैन, आईसोलेसनहरु बिस्तार हुँदै छन् तर पनि पर्याप्त छैन’–संविधान सभा सदस्य लामाले भन्नुभयो ‘सरकारको संयन्त्र जनताको जीवन रक्षा गर्ने स्वास्थ्य सामग्री खरिदमा कमिशनको खेलमा डुवेको छ, सरकारको लापरवाह, गैरजिम्मेवारीपन र अकर्मण्यताप्रति घोर निन्दा गर्दै लामाको कथन थियो– केन्द्र र प्रदेश सरकारले धुलिखेल र शीर मेमोरियल लगायत अन्य अस्पताल साथै स्थानिय तहले कम्तिमा १ सय बेडको हाई–फ्लो अक्सिजन सहितको आईसोलेसन व्यवस्थापन गर्नुपर्ने माग लामाले गरेका छन् । ‘जिल्लामा कोभिडका कुनै पनि बिरामीले आईसियू बेड र भेन्टिलेटरको अभावमा मर्न नपर्ने अवस्थाको ग्यारेन्टी गर्न पनि लामाले माग गरेका छन् ।

कांग्रेसले देशभरका आफ्नो पार्टी कार्यालयहरुलाई कोभिड उपचारमा उपयोग गर्न यस अघि नै सरकारसँग माग गरिसकेको छ । सो सम्बन्धमा रोशी गाउँपालिकाका अध्यक्ष डि.बि. लामाले संविधान सभा सदस्य लामाको भनाईलाई पुष्टि गर्दै हालको विषम परिस्थितिमा आईसोलेसन र अस्पतालमा आईसियू लगायतका पूर्वाधार विकास गर्नमा लागि आफूहरु लागिपरेको बताउनुभएको छ । उहाँले रोशी गाउँपालिकामा ४ वटा एम्बुलेन्स रहेको र आवश्यक परेमा गाउँपालिकाको २ वटा नगरसँग आबद्ध गाडी साथै आफ्नो निजि गाडी समेत नागरिकको सेवामा खटाउने उहाँको भनाई छ । गाउँपालिकामा एम्बुलेन्सकै कारण कोहि कसैले समस्या भोग्नु पर्दैन, कसैको मृत्यु पनि हुँदैन अध्यक्ष लामाले भन्नुभयो । समस्या भनेको अस्पताल र आईसियू वेडको हो, अहिले त्यस खालका पूर्वाधार विकास गर्न गाउँपालिका र जिल्ला समन्वयसँग कुरा भईरहेको लामाले बताउनुभयो ।

हाल रोशी गाउँपालिका र नमोबुद्ध नगरपालिकाले संयुक्त रुपमा नमोबुद्ध–४ जनक माविमा ४० वेडको अक्सिजन सहितको आईसोलेसन सेन्टर संचालनमा ल्याएका छन् । जसमा दुवै पालिकाका स्वास्थ्यर्कीले सेवा दिईरहेको रोशी गाउँपालिकाका सञ्चार संयोजक सिर्जना लामाले बताउनुभएको छ ।