वादी

– कृष्ण बजगाई, बेलायत

वादीहरुको बस्तीमा उ भर्खर बसाई सरेर गएको थियो । त्यहाँको वातावरण देखेर आश्चर्य चकित भयो । वादीको बस्तीमा त्यस्तो होला भनेर कल्पना पनि गरेको थिएन । त्यस बस्तीका बासिन्दाहरु कुनै न कुनै वादी बनेका थिए । त्यहाँ पूँजीवादी, साम्यवादी, प्रजातन्त्रवादी, जातिवादी, धर्मवादी, एनजिओवादी, अवसरवादी आदि सक्रिय थिए ।
उसलाई वादी हुन मन पर्दैन थियो । उसले भन्ने गर्दथ्यो, ‘वादीसँग राजनीति जोडिएको हुन्छ । राजनीतिमा लागेपछि नेता वा कार्यकता हुनै पर्ने वाध्यता हुन्छ । र वादी हुनु भनेको वादको दास हुनु पनि हो ।’ नेता, कार्यकता र दास हुनबाट जोगिन आफूलाई स्वतन्त्र राख्यो ।
वादी बस्तीको नयाँ बासिन्दा कुनै पनि वादी नभएको थाहा पाएपछि त्यहाँका मानिसहरु आश्चर्यचकित भए । विस्तारै विभिन्न वादीहरु उसलाई आफ्नो समूहमा आउन अनेक अनुरोध गर्न थाले । विभिन्न प्रलोभन देखाएर फकाए । तर तिनका अनुरोधलाई उसले हरेकपटक अस्विकार गर्याे । अलिकपछि उसलाई आआफ्नो समूहमा आउन जबरजस्ती गर्न थाले । जबरजस्ती गरेपछि उसले प्रतिवाद गर्यो । त्यसपछि उसलाई प्रतिवादी भन्न थालियो । सोही कारण उ पनि वादी भयो । अहिले उ प्रतिपक्ष नेता भएको छ ।