एलर्जीबाट बच्न छालालाई सुख्खा राख्नु हुदैन

आर.एल.श्रेष्ठ
चिसो मौसममा छालाको हेरचाह र सुरक्षाका उपायबारे निकै धयान दिन जरुरी रहन्छ । यदि होशियारी अपनाउन नसकेमा चिसो मौसममा छालाको एलर्जी हुने सम्भावना प्रवल रहन्छ । चिसो मौसममा छालाको एलर्जी हुनेहरुले न्यानो भएर बस्नुपर्छ । बारम्बार साबुन–पानीले हात, मुख, खुट्टा धोईराख्नु राम्रो होइन । सकिन्छ भने साबुनको प्रयोग नगर्नु राम्रो हुन्छ । साबुनको प्रयोग गर्दा पनि माइल्ड सोप अर्थात् मोस्चराइजरयुक्त बेबी सोपको प्रयोग गर्नु उत्तम मानिन्छ । यदि सावुन प्रयोग नगरी हुन्न भने साबुन प्रयोग गरिसकेपछि तुरुन्तै चिल्लो हुने आफूसँग भएको चिल्लो अर्थात् क्रिम, तेल, लोसनजस्ता चीज साबुन प्रयोग भएको शरीरको भागमा लगाउनु उचित रहन्छ ।

चिसो समयमा चिल्लोको कमी भएमा एलर्जि हुने चिलाउने गर्दछ । छालाको माथिको भाग सुख्खा भइरहेको हुन्छ । त्यसमा घामले भेट्दा पोल्ने, मसिनो घाउ हुने समस्या हुन्छ । यसको मुख्य कारण हावा र घामले हो । जाडो भगाउन घाममा बस्ने गरिन्छ, घाममा बस्दा घाम र हावाले छाला सुख्खा बनाउँछ । सुख्खा भएपछि छाला फुट्छ त्यसमा घाम परेपछि चिलाउने, पोल्ने समस्या आउने गर्दछ । त्यसैले छाला नरम, चिल्लो बनाइराख्न क्रिम र तेल लगाउनु जरुरी हुन्छ ।

जाडो महिनामा तेलको मालिस बढी गर्न उपयुक्त हुन्छ, मालिस गर्न संभव नभएको अवस्थामा लोसन भन्दा क्रिम प्रयोग गर्नु राम्रो हुन्छ । लोसनमा पानीको मात्र अलि बढी हुन्छ । क्रिममा पानीको मात्रा कम हुने भएकोले शरीरलाई लामो समयसम्म नरम बनाउँछ । हाम्रो घरमा भइरहने अलिभको तेल, नरिवलको तेल शुद्घ तोरीको तेल, दूधको तर पनि प्रयोग गर्न सकिन्छ । घ्यूमा थोरै नून राखेर फिट्दा क्रिम जस्तो बन्छ सो लगाउंदा पनि फाईदा हुन्छ तर शरीरमा यति लगाएपछि नरम कपडा लगाउनु उपयुक्त मानिन्छ ।

जाडो समयमा खानपिनमा समेत ध्यान दिन जरुरी रहन्छ । तेल लगाउने भनेको बाहिरबाट छालालाई चिल्लो बनाउनको लागि हो । भित्रैबाट प्राकृतिक रुपमा छालालाई चिल्लो, नरम बनाइराख्न खानाको महत्वपूर्ण भूमिका हुन्छ । माछा हाम्रो स्वास्थ्यको लागि लाभदायक छ । कम मात्रामा मात्रै माछा खाने प्रचलन भएकाले माछाबाट पाइने भिटामिन, प्रोटिनयुक्त क्याप्सुल पनि पाइन्छ । त्यो पनि खान सकिन्छ । यसले छाला मात्रै नभएर हड्डी तथा जोर्नीलाई पनि राम्रो गर्छ । यसैगरी ओखर, आलस, कटुस, बदामजस्ता खानेकुराले छालालाई प्राकृतिक रुपमा नरम बनाउँछ ।

चिसो समयमा तातो न्यानोकोलागि घाममा धेरै बस्ने गरिन्छ तर घाममा सकेसम्म नबस्नु राम्रो हो । किनभने घामले छालाको भित्रको बोसोको तहलाई सुकाएर पातलो बनाउँछ । त्यसले छाला सुख्खा हुने हुन्छ । छालाको समस्या बढी हुन्छ । भिटामिन डीको कमी भएको अवस्थामा घाममा बस्न भनिन्छ । त्यसको लागि पनि सीमित समय मात्रै बस्ने हो । लुगा सुकाउँदा, बाटोमा हिँड्दा शरीरमा पर्ने घाम पर्याप्त हुनसक्छ । धेरै घाममा एक्सपोज हुँदा छालाको अरु समस्या थपिन सक्छ ।