सहयोगी हातहरुप्रति लायन्स क्लब आभारी छ

काभ्रे । लायन्स क्लब अफ काठमाडौं इन्द्रेश्वरले ऐतिहासिक, धार्मिक तीर्थस्थल पनौतीमा सम्पन्न भएको १२ वर्षे मकरमेलामा स्वयंसेवकीय भूमिकामा रही अनवरत रुपले खट्नुहुने सम्पूर्ण लायन्स स्वयंसेवकहरुप्रति आभार व्यक्त गरेको छ ।

मंगलबार एक विज्ञप्ति प्रकाशित गर्दै पावन भूमि पनौतीमा भएको १२ वर्षे मकरमेलामा कोभिडको समेत पर्वाह नगरी अनवरत रुपमा आफ्नो उपस्थितिलाई दह्रोसँग प्रस्तुत गर्दै श्रद्धालुहरुलाई सहज रुपले स्नान गर्ने वातावरण मिलाएकोमा क्लबको तर्फबाट आभार व्यक्त गर्दै आगामी दिनमा पनि यस्तै किसिमका सहयोगहरुको अपेक्षा रहेको सचिव बिपशना शाक्यद्वारा हस्ताक्षरित विज्ञप्तिमा भनिएको छ । विज्ञप्तिमा भनिएको छ, नेपाल चान हुन अन्तर्राष्ट्रिय तेक्वान्दो संघ काभ्रेले जुन किसिमको योगदान गरेको छ, त्यो लायन्स क्लबको इतिहासमा अनुकरणीय रहेको छ । साथै संघका अध्यक्ष कृष्णकुमार थापा मगरप्रति लायन्स क्लब अफ काठमाडौं इन्द्रेश्वर आभारी भएको समेत उल्लेख गरेको छ ।
यसैगरी चितवनको माडी नगरपालिका वडा नं. ५ राधापुर वन टोली र छरछरेका बोटे, दराइ लगायत विपन्न परिवारलाई लक्षित गरी आव्हान गरिएको लत्ता कपडा संकलनमा उत्साहजनक सहभागिता जनाई कपडा उपलब्ध गराउनुहुने पतञ्जली योग समिति लगायत विभिन्न व्यक्तित्वहरुप्रति यस्तै किसिमको आगामी दिनमा पनि निरन्तर सहयोग रहने अपेक्षा सहित उहाँहरुप्रति आभार व्यक्त गरिएको विज्ञप्तिमा भनिएको छ । बोटे, दराइ लगायत विपन्न परिवारका झण्डै १ हजार ५ सय व्यक्तिहरुलाई वितरण गरिएको प्रेस सेन्टर माडीको हवला दिँदै संकलित लत्ता कपडा स्थानीय सञ्चारकर्मी अपेक्षा चौधरीमार्फत् उक्त स्थानमा वितरणको व्यवस्थापन गरिएको विज्ञप्तिमा उल्लेख गरिएको छ । त्यसैगरी स्वयंसेवकको रुपमा भूमिका निर्वाह गर्न तीर्थस्थल पुगेका स्वयंसेवकहरुप्रति व्यवस्थापन पक्षले देखाएको अभद्र व्यवहारप्रति गम्भीर ध्यानाकर्षण भएको समेत उल्लेख गरेको छ ।