सुर्यविनायक–धुलिखेल ६ लेनको सडक बन्ने

काभ्रे । सुर्यविनायक–धुलिखेल खण्ड अन्तरगतको सडक ६ लेन बनेसँगै समृद्ध बनेपा नगरका लागि यो आयोजना कोशेढुङ्गा सावित हुने बनेपा नगरका प्रमुख शान्तिरत्न शाक्यले बताउनु भएको छ ।
सो आयोजना सम्पन्न गर्नका लागि आफ्नो तर्फबाट कुनै कसर बाँकी नराख्ने समेत प्रमुख शाक्यले भेटमा बताउनु भएको छ । यो आयोजनाले बनेपा नगर, काभ्रे जिल्लाको मात्र नभई समग्र मुलककै समृद्धिको ढोकाको रुपमा रहेको अरनिको राजमार्ग अन्र्तगत सुर्यविनायक, धुलिखेल खण्डको स्तरबृद्धि हुने खवरले तमाम काभ्रेलीमा उल्लास छाएको समेत प्रमुख शाक्यको कथन छ ।
यो सुखद् खवरलाई काभ्रेली जनताले पक्कै पनि न्याय गर्नेछन् । यो आयोजना सम्पन्न गर्न सम्पूर्ण राजनीतिक शक्तिहरु एक भएर अगाडी लाग्नु हुनेछ भन्ने विश्वास आफूले राखेको बताउनु भएको छ । यो अवस्थामा विवेक पु¥याएर राजनीतिक नेतृत्वले पक्कै पनि सहज रुपमा विकासलाई अगाडी लैजाने छन् भन्ने विश्वास आफूले राखेको प्रमुख शाक्यको जिकिर छ ।
विकासको पहिलो पूर्वाधार भनेकै सडक हो । जव सडकले सम्पन्न हुन पुगिन्छ तव समृद्धिको सपना पुरा हुन्छ । यो समृद्धिले मुलुकको अग्रगामी छलाङ्ग मार्न कोशेढुङ्गा सावित गर्नेछ भन्ने विश्वास आम काभ्रेलीहरुले राखिरहेका छन् । जति पनि विकास निर्माणका कुरा जोडिन्छन् त्यसको महत्वपूर्ण हिस्सा भनेको सडक नै हो । यसैको माध्यमबाट आम नागरिकले आफ्नो जिवनस्तर उठाउनकालागि विभिन्न गतिविधिहरु गर्ने गरेको प्रमुख शाक्यले खुलासा समेत गर्नुभएको छ ।
अरनिको राजमार्ग अन्तरगत सुर्यविनायक धुलिखेल सडक खण्ड ६ लेनको बन्ने निश्चित भएको छ ।
जापानीज सरकारको सहयोगमा जाईकाले सो परियोजना बनाउने भनिएतापनि पछिल्लो समय उसले परियोजनाबाट हात झिकेपछि नेपाल सरकार आफैंले उक्त आयोजनालाई निरन्तरता दिन लागेको जानकारी सडक विभागले गराईएको छ । सडक गुणस्तरिय हुनुको साथै दिर्घकालिन टिकाउ हुने ढंगबाट निर्माण हुन लागिएको यातायात आवत जावतमा समस्यामा केही सहजताको लागि दुई खण्डमा विभाजन गरेर विस्तार गर्न लागेको जानकार सरोकारवाला निकायले अवगत गराएको छ ।
सडक विभाग कार्यालयका अनुसार सूर्यविनायक धुलिखेल र धुलिखेल–सिन्धुली सडक आयोजना अन्तरगत साँगा–धुलिखेल खण्डको निर्माणका लागि टेन्डर आह्वान भइसकेको बताईएको छ । उक्त खण्ड निर्माणका लागि झण्डै साढे ९ अर्ब लागतमा सरकारले आफ्नै स्रोतबाट सडक विस्तार गर्न लागेको सडक विभागले जनाएको छ ।
सडक विभागका अनुसार छिट्टै ‘सूर्यविनायक–साँगा खण्डको पनि टेन्डर हुने तयारीमा रहेको विभागले जनाएको छ । यी दुवै खण्डलाई एक साथ अघि बढाएर सूर्यविनायक–धुलिखेल सडक विस्तार कार्य सम्पन्न गराउने कार्यमा नेपाल सरकार लागी परेको सडक विभागले जनाएको छ । अब बन्ने सडकमा चार मुख्य लेन र दायाँ–बायाँ २ वटा सर्भिस लेन गरी ६ लेनमा सडक विस्तार गरिने उल्लेख गरिएको छ । सो आयोजना सम्पन्न पश्चात अहिले जुन किसिमको ट्राफिक समस्या झेल्नु परिरहेको छ त्यसको अन्त हुनेमा आफू विश्वस्त रहेको बताउनु हुन्छ बनेपा नगर प्रमुख शान्तिरत्न शाक्य । उहाँका अनुसार तत्कालै सडक स्तर उन्नति हुन सकेमा ट्राफिक समस्याको समाधान हुनुका साथै समृद्धि बनेपाको सपना साकार हुने समेत बताउनु भएको छ ।