मलाई कुकुर बनाईदेऊ

अजित उत्सव

अर्को जन्ममा मलाई
कुकुर बनाएर जन्माईदेऊ भगवान !
कुकुर भएर जन्में भने
कमसेकम म,
मानिसभन्दा इमानदार बन्न सक्छु !!!

कुकुर भएँ भने बिपदमा भुक्न सक्छु,
घरमा पस्ने चोरलाई रोक्न सक्छु
आफ्ना दुश्मनलाई टोक्न सक्छु

मानिस भएर जन्में भनें म चोर बन्न सक्छु
स्वार्थ मिले चोरलाई पनि साधु भन्न सक्छु
कुकुर भएर जन्में भने
मान्छेभन्दा इमान्दार बन्न सक्छु
मानिसहरुलाई छिः मानिस भन्न सक्छु ।

कुकुरलाई पैसाको के महत्व !
कुकुरलाई पदको के पर्वाह !!
कुकुरलाई कुर्चिको के लालच !!!
कुकुरलाई भ्रस्टाचारको के मोह !!
मलाई कुकुर बनाईदेउ भगवान !
म मान्छे भएर जन्में भने
पैसाको लोभले भाई–भाईमा लड्न सक्छु
पदको मोहमा नीचभन्दा नीच काम गर्न सक्छु
कुर्चीको लालचमा झुट्माथी झुट बोल्न सक्छु
भ्रस्टाचार गरेर देशमाथी गद्दारी गर्न सक्छु

बरु, कुकुर भएँ भने
मालिकको बफादार भएर काम गर्न सक्छु
बाँचुन्जेल इमान्दार भएर मर्न सक्छु ।

कुकुर भएँ भने
बोल्ने छैन कसैलाई अपशब्द
लगाउने छैन कसैमाथी गलत नजर
राख्ने छैन बुढी आमालाई बृद्धाश्रम
चलाउने छैन बच्चाहरुको छातीमा गोली
तान्ने छैन अगाडि बढ्नेहरुका खुट्टा

माग्ने छैन बिहेमा दाइजो
गराउने छैन बर्षैपिच्छे गर्भपतन
लुट्ने छैन संधियारको एक हात जमिन
जलाउने छैन छोरो नपाएको निहुँमा श्रीमती

मलाई कुकुर बनाएर जन्माईदेउ भगवान
म कुकुर भएर जन्में भने
माथि उल्लेखित मानव हर्कत कदापी गर्ने छैन ।