इतिहास रच्दै बृहत् खेलकुद महोत्सव सम्पन्न

काभ्रे । जिल्लाव्यापी बृहत् खेलकुद महोत्सव मंगलबार एक समारोहबीच बनेपामा सम्पन्न भएको छ ।
जिल्ला खेलकुद विकास समिति र जिल्ला समन्वय समितिको संयुक्त आयोजनामा भएको उक्त महोत्सवमा जिल्लाका १३ वटै पालिकाको सहभागिता रहेको थियो । प्रतियोगितामा छानिएका १३ खेलमध्ये उत्कृष्ट स्थान हासिल गर्ने पालिकालाई सर्वाधिक नगद सहित सम्मान गर्ने योजना अनुसार सर्वाधिक चासोको रुपमा रहेको पुरुष भलिबल खेलतर्फ जिल्लाको विकट स्थानमा रहेको महाभारत गाउँपालिकाले बाजी मारेको छ ।
त्यसैगरी दोस्रो स्थानमा जिल्लाको विकट भूगोलको रुपमा रहेको खानीखोला गाउँपालिकाले आफ्नो वर्चश्व जमाएको छ भने तेस्रो स्थानमा बनेपा नगरपालिका सीमित भएको छ । त्यस्तै महिला भलिबलतर्फ नमोबुद्ध नगरपालिका पहिलो भयो भने बनेपा नगरपालिकाले दोस्रोमा चित्त बुझाएको छ भने पनौती नगरपालिकाले तेस्रो स्थान प्राप्त गरेको छ । अर्काे सर्वाधिक चासोको विषय रहेको फुटबल प्रतियोगितामा पनौती नगरपालिकाले पहिलो स्थान प्राप्त गरेको छ भने रोशी गाउँपालिका दोस्रो र खानीखोला गाउँपालिकाले तेस्रो स्थान प्राप्त गरेको छ ।
त्यस्तै कबड्डी पुरुष प्रतियोगितामा पहिलो स्थान पनौती नगरपालिका छ भने दोस्रो स्थानमा पाँचखाल नगरपालिका र तेस्रो स्थानमा बनेपा नगरपालिका र रोशी गाउँपालिका रहेका छन् । कबड्डी महिलामा पनौती नगरपालिका प्रथम, बनेपा नगरपालिका दोस्रो र पाँचखाल नगरपालिका र रोशी गाउँपालिकाले तेस्रो स्थान प्राप्त गरेका छन् ।
त्यसैगरी एथ्लेटिक्स प्रतियोगितामा पाँचखाल नगरपालिकामा प्रथम, पनौती नगरपालिका द्वितीय र नमोबुद्ध नगरपालिका तृतीय स्थान प्राप्त गरेका छन् । कराँतेतर्फ बनेपा नगरपालिका प्रथम, तेमाल गाउँपालिका द्वितीय र पाँचखाल नगरपालिका तृतीय भएका छन् । तेक्वान्दो प्रतियोगितामा पनौती नगरपालिका प्रथम, बेथानचोक गाउँपालिका द्वितीय र धुलिखेल नगरपालिकाले तृतीय स्थान हासिल गरेका छन् भने फुलकन्ट्रयाक कराँतेमा बनेपा नगरपालिका प्रथम, पाँचखाल नगरपालिका द्वितीय र नमोबुद्ध नगरपालिका तृतीय भएका छन् भने आइटीएफ तेक्वान्दोमा धुलिखेल नगरपालिका प्रथम, पाँचखाल नगरपालिका द्वितीय र बनेपा नगरपालिका तृतीय भएका छन् ।
समापन कार्यक्रममा संघीय सांसद गोकुल बाँस्कोटा, बागमती प्रदेश सांसद रत्न ढकाल, लक्ष्मण लम्साल, पनौती नगरपालिका प्रमुख रामशरण भण्डारी, बनेपा नगरपालिका नगर प्रमुख शान्ति रत्न शाक्य, नमोबुद्ध नगरपालिका प्रमुख कुन्साङ लामा र सम्बन्धित पालिकाका उपप्रमुखहरुको उपस्थिति रहेको थियो । कार्यक्रममा बनेपा नगर प्रमुख शान्ति रत्न शाक्यले स्वागत मन्तव्य राख्नुभएको थियो भने कार्यक्रमको सभापतित्व जिल्ला समन्वय समितिका प्रमुख दिपक गौतमले गर्नुभएको थियो ।