सडक निर्माण तीव्र बनाउन मन्त्री कुलमान घिसिङकाे निर्देशन

सूर्यविनायक / अरनिकाे राजमार्गकाे सूर्यविनायक- धुलिखेल खण्ड विस्तार कार्यकाे भाैतिक प्रगति ५० प्रतिशत माथि पुगेकाे छ । पछिल्लाे समय ऊर्जा, भौतिक पूर्वाधार तथा शहरी विकासमन्त्री कुलमान घिसिङले अनुकूल मौसमको फाइदा उठाउँदै देशभरका सडक निर्माण कार्य तीव्र गतिमा अघि बढाउन सम्बन्धित निकायलाई निर्देशन दिएसँगै निर्माणकार्य सूचारु रहेका आयाेजनाले तिब्रता पाएका छन् ।

सूर्यविनायक–धुलिखेल १५.८ किलोमिटर सडकको ६ लेन विस्तारको काम दुई प्याकेजमा भइरहेको छ । सूर्यविनायक–साँगा (८.३ किमी) : ४५% प्रगति भएकाे छ भने साँगा–धुलिखेल (७.५ किमी)  ५५% प्रगति माथि पुगेकाे छ । याे खण्डमा करिव २ किलाेमिटर सडक कालाेपत्रे समेत भएकाे छ । दुवै प्याकेजमा टेवा पर्खाल र नाली निर्माण ९५% पूरा भइसकेको छ।

मन्त्री घिसिङले निर्णय बाँकी विषय तुरुन्त टुंग्याउन, जनशक्ति र उपकरण थप्न, र आगामी असारभित्र सडक विस्तार पूरा गर्ने लक्ष्यसहित काम गर्न निर्देशन दिएका छन्। उनले बजेट अभाव नहुने बताएका छन्, यद्यपि परियोजनाका लागि ७० करोड विनियोजन गरिएको छ भने करिब ४ अर्ब थप आवश्यक रहेको छ। मन्त्री घिसिङले सरकारले थप बजेट व्यवस्थापन गर्ने प्रतिबद्धता व्यक्त गर्दै चालू आर्थिक वर्षमै काम सम्पन्न गर्न निर्देशन दिएका छन् ।

घिसिङले सिमा विवाद रहेकाे बनेपा खण्डकाे निर्माणकार्य सुचारु गराउन समस्या समाधानका लागि समन्वय र सहजिकरण गर्न बनेपा नगरपालिकालाई आग्रह गरेका छन् ।

अनुकूल मौसम र मन्त्रीको कडा निर्देशनसँगै सडक निर्माण आगामी महिनामा अझ तीव्र हुने अपेक्षा गरिएको छ। राजमार्गमा सूर्यविनायक- साँगा खण्डमा एकवटा पुल र साँगा धुलिखेल खण्डमा दुईवटा पुल निर्माण गर्नु पर्ने छ । जसमा साँगा-धुलिखेल खण्डकाे भैंसेपाटीमा पुन निर्माणकाे कार्य अघि बढिसकेकाे छ । सिमा विवादका कारण बनेपा पुण्यमाता खाेलाकाे पुलकाे निर्माणकार्य भने सुरु भएकाे छैन । साथै पुलबजार देखि बनेपा बजारकाे खण्ड सिमा विवादका कारण निर्माणकार्य राेकिएकाे छ ।