च्याम्राङवेशीका मतदाताको घरदैलोमा नेकपाका उम्मेदवार हुँमागाई

बेथानचोक/ प्रतिनिधि सभा सदस्य निर्वाचन २०८२ नजिकिदै जाँदा काभ्रेपलाञ्चोकको प्रतिनिधि सभा सदस्य निर्वाचन क्षेत्र नं. २ का नेपाली कम्युनिष्ट पार्टीका उम्मेदवार बसुन्धरा हुँमागाई मतदाताको घरदैलोमा पुगेर भेटघाट गर्नुभएको छ ।

आईतबार निर्वाचन क्षेत्र नं. २ को बेथानचोक गाउँपालिकास्थित वडा नं. १ च्याम्राङवेशीका मतदाताको घरदैलोमा पुगेर आफ्नो कुरा सुनाउँदै मत प्रदान गर्न आग्रह गर्नुभएको हो । आज बेथानचोक पुगेको घरदैलो अभियान टोलीले वडा नं. ४ को पार्टीको वडा कार्यालय उद्घाटन गरी सुरु गरेको थियो । त्यसपछि पार्थलीमा भेटघाट, ढुंखर्कमा २ नं. वडाको पार्टी कार्यालय उद्घाटन तथा वडा नं. १ मा पनि पार्टीको वडा कार्यालय उद्घाटन गरेका छन् ।
सो क्रममा उहाँ नेतृत्वको टोलीले त्यहाँका झिंगे र फुर्केथलीलगायतका वडा नं. १ को सबै गाउँ बस्तिहरुमा पुगेर मतदाताहरुसंग भेटघाट गर्नुभएको छ । च्याम्राङवेशी पुग्नुभएका हुँमागाई नेतृत्वको टोलीलाई त्यहाँका नागरिकले यस पटक आफुहरुले तारा चिन्हमा मतदान गर्ने सल्लाह भएको र त्यही अनुसार मतदान गर्ने बचन व्यक्त गरेका छन् । सो क्रममा मतदाताहरुले आफ्ना गाउँ टोलको समस्या समाधानका लागि आग्रह गरेका थिए ।

नेपाली कम्युनिस्ट पार्टी काभ्रेपलाञ्चोक जिल्लाको निर्वाचन क्षेत्र नं. २ को निर्वाचन परिचालन कमिटीको बुधवार सम्पन्न भेला तथा बैठकले पार्टी केन्द्रिय सदस्य टोक बहादुर वाईवाको संयोजकत्वमा निर्वाचन परिचालन मूल कमिटी गठन गरेर निर्वाचन अभियान थालनी गर्ने निर्णय गरेको छ ।