पार्टी शुद्धीकरण र पुनर्गठनका लागि एमालेले प्रदेशबाट सुझाव सङ्कलन थाल्यो

काठमाडौँ । नेकपा (एमाले) ले पार्टी शुद्धीकरण, सुदृढीकरण, रूपान्तरण तथा पुनर्गठनका लागि प्रदेशस्तरबाट सुझाव सङ्कलन अभियान सुरु गरेको छ।

गत स्थानीय तह उपनिर्वाचनको समीक्षा गर्दै पार्टी र जनताबीचको सम्बन्ध अझ प्रभावकारी बनाउने उद्देश्यले गठन गरिएको कार्यदलले बागमती प्रदेशबाट सुझाव सङ्कलनको प्रक्रिया सुरु गरेको हो। एमालेका केन्द्रीय प्रचार तथा प्रकाशन विभाग प्रमुख नीरज आचार्यका अनुसार बागमती प्रदेश सङ्गठन कमिटीको समन्वयमा काठमाडौंमा आयोजित भेलामार्फत अभियानको सुरुआत गरिएको हो।

गत जेठ १० गते बसेको एमाले सचिवालय बैठकले उपाध्यक्ष रामबहादुर थापाको संयोजकत्वमा १५ सदस्यीय कार्यदल गठन गरेको थियो। कार्यदलले विभिन्न प्रदेश, जनसङ्गठन, विभाग तथा पार्टी निकायबाट सुझाव सङ्कलन गरी प्रतिवेदन तयार गर्नेछ।