मण्डला थिएटरमा प्रज्ञा–प्रतिष्ठानका पदाधिकारी र रङ्गकर्मीबीच आत्मीय भेटघाट तथा अन्तर्क्रिया

काठमाडौं / नेपाल सङ्गीत तथा नाट्य प्रज्ञा–प्रतिष्ठानका कुलपति तथा प्राज्ञ परिषद्का सदस्यहरूले थापागाउँस्थित मण्डला थिएटरमा रङ्गकर्मीहरूसँग आत्मीय भेटघाट तथा अन्तर्क्रिया गरेका छन्।

भेटघाटका क्रममा मण्डला थिएटरका रङ्गकर्मीहरूले आफ्ना अनुभव, भोगाइ तथा सिर्जनात्मक यात्राका विविध पक्षबारे अनुभव आदान–प्रदान गरेका थिए। नेपाली रङ्गमञ्चको वर्तमान अवस्था, सम्भावना, चुनौती तथा आगामी यात्राबारे समेत गहन छलफल भएको थियो।

अन्तर्क्रियामा नेपाली रङ्गमञ्चको विकासका लागि प्राज्ञिक तथा व्यावसायिक क्षेत्रबीच सहकार्य आवश्यक रहेकोमा जोड दिइएको थियो। सहभागीहरूले रङ्गकर्मीका अनुभव, सिर्जनात्मक अभ्यास तथा समकालीन रङ्गमञ्चका सवालमा विचार आदान–प्रदान गरेका थिए।

मण्डला थिएटरले नेपाली कला, साहित्य तथा रङ्गमञ्चको विकास र प्रवर्द्धनका लागि प्रज्ञा–प्रतिष्ठानले गरेको पहलप्रति आभार व्यक्त गरेको छ। आगामी दिनमा यस्ता भेटघाट, संवाद र सहकार्यलाई निरन्तरता दिँदै नेपाली रङ्गमञ्चलाई थप समृद्ध र सशक्त बनाउन योगदान पुग्ने अपेक्षा थिएटरले जनाएको छ।

मण्डला थिएटर परिवारले प्रज्ञा–प्रतिष्ठानका पदाधिकारी तथा सदस्यहरूको उपस्थिति, आत्मीयता र सार्थक संवादका लागि धन्यवाद व्यक्त गरेको छ।