भुकम्पपीडित वर्षामा पनि अझै टहरामै !

०७२ को विनासकारी भूकम्पपछि २ वटा जाडो र २ वटा वर्षायाम पनि टहरामै बिताइसकेका भूकम्पपीडितहरुले यस वर्षको वर्षायाम पनि टहरामै कटाउनु पर्ने भएको छ ।
पूनर्निर्माणको कामले भर्खरै मात्र गति लिएको भएपनि अधिकांश गाउँहरुमा पीडितहरुले घर बनाउन सकेका छैनन् । सरकारले सहयोग गर्ला र घर बनाउन पाइएला भनेर आशा गरेका उनीहरुलाई सरकारी सहयोग आए पनि भरपर्दो नभएकाले यहाँको पूनर्निर्माण अहिले पनि सुस्त छ । त्यसैले पीडितहरु टहरामै बस्नु परेको हो ।
सरकारले दिएको अनुदानको पहिलो किस्ताको ५० हजार रुपैयाँ धेरैले लिएका छन् । दशैंतिहारमा दिएको पैसा धेरैजसोले त्यतिबेला नै सक्याइसकेका छन् । बाँकी केहिले घर बनाउन शुरु गरेपनि धेरैजसोले त्यति पैसाले घर बनाउन पनि नसकिने र थप रकम पनि जुटाउन नसक्ने अधिकांश पीडितहरु के गर्ने भनेर अझै अन्योलमै छन् । सरकारले आशा देखाएको तथा सहयोग नगरेकोले यसवर्ष पनि घर बनाउन नसकेको पीडितहरुको गुनासो छ । लगातार वढ्दै गरेको गर्मि र हुरिबतासले भूकम्प प्रभावित जिल्ला काभ्रेमा पीडितहरु समस्यामा परेका छन् ।
सरकारले दिने भनिएको सहयोग अहिले सम्म लक्षितक्षेत्र सम्म थोरै मात्र पुगेको छ । यसले के गर्नु ? त्यसैले दिनप्रतिदिन समस्याहरु थपिएका छन् । विशेषगरि केटाकेटी र बुढापाकाहरुलाई समस्या थपिएको छ । ‘यसो गरौं भन्ने केहि उपाय समेत छैन’ पीडितहरु भन्छन्–“ यस वर्ष पनि घर बनाउन नपाइएला जस्तो छ ।” सरकारले घर बनाउन दिने भनिएको अनुदान पनि सबैले पाएका छैनन् । पाएकाहरुले दशैंतिहार लगायतका चार्डपर्वमा सकिसकेका छन् । यस्तो अवस्थाले कसरी घर बनाउनु र ? भूकम्पको बेला मुस्किलले जोगाइएका चौपायाहरु पनि टहरा भित्रै छन् । मान्छे र पशुहरु सँगै रहनु पर्ने बाध्यताले मानिसमा रोगको संक्रमण थपिएको छ । पशुहरु पनि मर्न थालेको खबर आएको छ । यसले कृषकहरु चिन्तित छन् ।
भूकम्प पीडितहरुलाई घर बनाउन सरकारले २ प्रतिशत व्याजमा आवासकर्जा दिने यहाँका पीडितहरुले पनि सुनेका छन् । तर सो कर्जा लिन ज्यादै झण्झट रहेको पीडितहरु भन्छन् । कर्जा लिने मापदण्ड पीडितको पक्षमा नरहेको भन्दै ठूला व्यापारीवर्गलाई लाग्ने जस्तै नियम लगाएर भूकम्पपीडितले कसरी घर बनाउने भनेर प्रश्न गर्छन्, पीडितहरु ।
आम्दानीको स्रोत हुने केहि भूकम्पपीडितहरुले भने भर्खरै घर बनाउन जग हालेका छन् । तर उनीहरुलाई पनि घर सम्पन्न गर्न कठिन नै छ । सक्नेले त जसरी पनि घर बनाउलान् तर नसक्ने बहुसंख्यक नागरिकहरु अरुका घर हेरेर बस्नुको विकल्प छैन । भूकम्पपछिका २ वटा वर्षायाम र २ हिउँद जाडो टहरामै कटाएका पीडितहरुले अब यो वर्षा पनि टहरामै बिताउँदै छन् । यसरी सरकारकै भर पर्ने हो भने दश वर्षमा पनि पुनर्निमाण गर्न नसकिने यहाँका भूकम्पपीडितहरुको अनुमान छ । जसरी पनि भूकम्प प्रभावित ठाउँका नागरिकका लागि सरकारले अब छिट्टै आवश्यक सहयोग गर्नु पर्ने धुर्मुस सुन्तली फाउण्डेशनका इन्जिनियर अर्जुन न्यौपानेको सरकारसँग सुझाव छ । अन्यथा पीडितहरु झन समस्यामा पर्ने उनले बताए । जिल्लामा ७२ हजार भन्दा धेरै घरहरु पुनर्निर्माण गर्नु पर्ने छ तर यतिबेला सम्म ५ हजार मात्र घरहरु निर्माण भएका छन् । बाँकी मध्ये थप १० प्रतिशत जति शुरु गरिएको बताइएको छ ।