फनबोर्डको सहयोगमा पिउने पानीमा सहज, ११ लाख ३२ हजार खर्चिदा प्रतिघण्टा ८७ हजार लिटर पानी

पाँचखाल-साविक होक्से गा.बि.स हाल पाँचखाल नगरपालिका वडा नं ७ काफ्ले टोल र आसपासको स्थानमा विनासकारी महांभूकम्पले गर्दा पानीको मुलहरु सुकेर पिउने पानीको हाहाकार भएको अवस्थामा फनबोर्डको सहयोगमा डिप बोरिङ्गको व्यवस्था हुंदा पिउने पानीको सहज भएको छ ।

पिउने पानीको व्यवस्थाको लागि १ सय २ मिटरको गहिराई सम्म खनेको बोरिङ्गबाट प्रतिघण्टा ८७ हजार लिटर पानी आउने भएको छ । ११ लाख ३२ हजार ६ सय ३० रुपैयाँ लागतमा उक्त बोरिङ्ग खन्ने कार्य सम्पन्न भएको शिखरपुर सिमपोखरी खानेपानी तथा सरसफाई उपभोक्ता समितिको अध्यक्ष रामप्रसाद बोलखेले बताउनु भयो ।

अध्यक्ष बोलखेले भन्नुभयो “भूकम्पले गर्दा खानेपानीको समस्या हुंदा फनबोर्डसंग अनुरोध गरेउ, सिंङ्गै गाउं काकाकुलको अवस्थामा रहेकोकोले फनबोर्डको आर्थिक सहयोग पिपियुके नामक संस्थाको समन्वय साथै उपभोक्ता समितिको सकृयतामा बोरिङ्ग खन्ने कार्य सम्पन्न भयो” । पानी तिरणलाई सहज वनाउनको लागि पानी ट्यांङ्कि बनाउने कार्य र पाईपलाईको लागि आर्थिक समस्या भएकोले नगरपालिकालाई अनुरोध गरेका छौं, नगरबाट वजेट आएपछि १ सय ३४ घरधुरिमा सहज ढंगबाट पानीको व्यवस्था गर्ने तयारी रहेको बताउनु भयो ।

खानेपानिको अभावलाई सहजको लागि स्थानियहरुको सकृयतामा सम्पन्न भएको बोरिङ्गमा ८ इञ्च र ६ इञ्चको पाईप प्रयोग गरिएको छ । बोरिङ्गबाट ३ इञ्चको पिउन योग्य पानी निक्लिएपछि पानीकोसमस्याबाट पिडित स्थानियहरु हर्सित भएका छन् । पाँचखाल ७ मा जस्तै पाँचखालको अन्य स्थानहरुमा समेत खानेपानीको अभाव भएकोले नगरपालिकाले बिभिन्न ७ स्थानमा बोरिङ्ग खन्न बजेट व्यवस्था गरेको थियो । बोरिङ्गको पानीको स्रोत भरपर्दो नभएकोले दिर्घकालिन ढंगको पानी व्यवस्थाको लागि शुनकोसिबाट पाँचखालमा पानी ल्याउने तयारी भएको छ ।