आफूलाई उत्कृष्ट कायम राख्दै पनौती

पनौती-नगरपालिकाहरुको माझमा आफूलाई उत्कृष्ट रुपमा आफ्नो साख कायम राख्न पनौती नगरपालिका उद्रत छ भन्ने प्रमाण एकपछि अर्काे राख्दै आएको छ ।

गत वर्ष लैना भैंसी भत्ताले निकै चर्चा बटुल्न सफल पनौती नगरपालिका यो वर्षको शुरुवातीमै उत्कृष्ट सम्मानबाट चर्चाको शिखरमा पुगेको छ । गत शनिबार आफ्नै सभा कक्षमा भएको सम्मान कार्यक्रममा नगरभित्र उत्कृष्ट योगदान पु¥याउने विभिन्न विधाका व्यक्तित्वहरुलाई एक भव्य समारोहका बीच सम्मान गरेको छ ।

यसरी सम्मानित हुनेमा उत्कृष्ट कर्मचारीमा वरिष्ठ प्रशासकीय अधिकृत इन्द्रप्रसाद अधिकारी र कार्यालय सहायक प्रल्हाद सापकोटा, ज्येष्ठ नागरिक तर्फ एक शताब्दी पार गर्नु हुनेहरुमा लिलादेवी हुमागाईं र रामलाल कर्माचार्य, सञ्चारको क्षेत्रमा उत्कृष्ट योगदान पु¥याएकोमा सञ्चारकर्मी मधुसुदन गुरागाईं दोस्रो पटक सम्मानित हुनुभएको छ ।

त्यसैगरी शिक्षासेवी शिक्षाविद् रामप्रसाद अधिकारी, भाषा तथा संस्कृतविद् तुयुकाजी ताम्राकार, स्वास्थ्यको क्षेत्रमा डा. सुमन ताम्राकार, स्वास्थ्य स्वयंसेविका सञ्चमाया तामाङ, पनौती नगरको प्रतिक लोगो डिजाइनर मञ्जु स्याउला, सहकारी अभियन्ता दिपक थापा, पर्यटन क्षेत्रमा कौशिल्या अमात्य, खेलकूद विधामा विजयसुन्दर सैंजु, संस्थागत करदातामा मल्पी इन्टरनेशलन एकेडेमी छ भने व्यक्तिगत करदातामा सुनिल र सुशिल सैंजु छन् ।

विद्यालयतर्फ कुशादेवी मा.वि., सूर्याेदय मा.वि., स्वास्थ्यचौकीमा कुशादेवी स्वास्थ्य चौकी र हातेमालो बालक्लब कुशादेवी सम्मानित भएका छन् । त्यस्तै कृषि र पशु विधामा इन्द्रेश्वर थल्पु सामुदायिक वन “क” गाईभैंसी पालक कृषक रेवती सापकोटा, सामूहिक खेतीमा जितबहादुर खत्री, कृत्रिम गर्भाधानको क्षेत्रमा महत्वपूर्ण भूमिका निभएकोमा दामोदर केसी लगायत सम्मानित हुनुभएको थियो ।
स्थानीय निकायमा जनप्रतिनिधिको आगमन पश्चात यस किसिमको कार्यक्रम पहिलो पटक भएको कार्यक्रम सञ्चालक एवं शिक्षा विभागीय अधिकृत महेश्वर जंगमले बताउनु भएको थियो । जंगमका अनुसार नगरभित्रका विभिन्न विधाका २५ जना बौद्धिक व्यक्तित्व सम्मानित हुनुभयो भने विद्यार्थीतर्फ जेहेन्दार र एसईईमा उत्कृष्ट नतिजा ल्याउन सफल विद्यार्थीहरुलाई नगद सहित सम्मान गरिएको थियो । यसरी सम्मानित हुनेहरुमा १ सय ७८ विद्यार्थी रहेको बताउनुभयो । उक्त अवसरमा कृषितर्फ १८ जना किसानका लागि मिनी टेलर वितरण गरिएको थियो ।

कार्यक्रममा नगरपालिकाका प्रमुख भिम न्यौपानेबाट सम्मानित हुनुहुने सबैलाई धन्यवाद ज्ञापन गर्दै आगामी दिनमा पनि योभन्दा अझ भव्य र सभ्य कार्यक्रम सहित सम्मान गर्ने अवसर मिलोस् भन्दै कार्यक्रम समापन गर्नुभएको थियो । कार्यक्रमको औचित्यता माथि प्रकाश पार्दै प्रमुख प्रशासकीय अधिकृत हरिप्रसाद चापागाईंले कार्यक्रमले सम्मानितहरुलाई उर्जा प्राप्त हुने र आगामी दिनहरुमा आफ्नो पेशाप्रति दत्तचित्त भई लाग्न प्रेरणा मिल्ने बताउनुभयो । त्यसैगरी कार्यक्रममा सम्मानित व्यक्तित्व वरिष्ठ प्रशासकीय अधिकृत इन्द्रप्रसाद अधिकारीले स्वागत मन्तव्य राख्नुभएको थियो ।