नेपाल रेडक्रस हिटलर शैलीमा, दृष्टि जाँच परियोजनामा मनोमानी

बनेपा-नेपाल रेडक्रस सोसाइटी केन्द्रीय कार्यालयदेखि जिल्ला शाखासम्म आलोचना नै आलोचनाको खाँदमा परिणत भएको सम्बन्धित अभियान्ताहरुले बताएका छन् । उहाँहरुका अनुसार अब रेडक्रस मानविय क्षेत्रमा सेवामुखी खोलमै सीमित भएको आरोप लगाएका छन् ।

विवादको चरम उत्कर्षबीच विगठन र पुनबहालीको दोहोरीमा निकै समय अल्झिएको रेडक्रस केन्द्रलाई सम्मानित अदालतले श्वास भरिदिएता पनि जिल्ला शाखा भने सच्चिने छाँटकाँटमा नभएको रेडक्रस अभियान्ताहरुको आरोप छ । रेडक्रस काभ्रे शाखाको बैठकमा हुने विवाद सडकसम्म नआएका होइनन् । कठालो समाउनेदेखि लिएर मुक्का हानाहानसम्म नौलो नभएको उहाँहरुको टिप्पणी छ ।

विगतमा भएका बैठकी असन्तुष्टी पोख्दै अभियान्ताहरुको आक्रोश थियो, कुर्सीले हान्दा राम्रैसँग हान्न दिनुपर्ने रहेछ, गल्ती भो भन्दै टिप्पणी गरेका थिए । यस्ता अभिव्यक्ति बाहिर आउनुको पछाडि हालै नेपाल रेडक्रस सोसाइटी र वीपी नेत्र प्रतिष्ठानको साझेदारीमा आएको दृष्टि जाँच परियोजनाभित्रका असन्तुष्टीहरु बुझिएको छ । उक्त कार्यक्रम कार्यसमितिका केही व्यक्तिहरुले व्यक्तिगत ढंगबाट मनोमानी किसिमले सञ्चालन गरेको भन्दै जिल्ला कार्यसमितिका दुई तिहाइ सदस्यहरुले असन्तुष्टी जाहेर गरेका छन् ।

उहाँहरुले नेतृत्वले अत्यन्तै गैर जिम्मेवारी ढंगबाट रेडक्रस चलाएको भन्दै नेपाल रेडक्रस सोसाइटी काभ्रे शाखाप्रति हिटलर शैलीको आरोप लगाएका छन् । उक्त परियोजनाका लागि सहभागी छनौट प्रक्रिया नै गलत भएको र आफ्ना आसेपासेलाई मात्रै सहभागी गराएको नीति, नियम बाहिर गएर कार्यक्रम चलाएको भन्दै रेडक्रसप्रेमीहरुले आक्रोश जाहेर गरेका हुन् ।

उहाँहरुले यदि रेडक्रसका अगुवाले आफूलाई सुधार्दैनन् भने रेडक्रस काभ्रेका विरुद्ध जुनसुकै बेला जुनसुकै किसिमको कदम उठाउन पछि नपर्ने उहाँहरुले चुनौती दिनुभएको छ । रेडक्रसका नाउँमा नीति, नियमलाई कुल्चेर अगाडि बढ्दै जाने हो भने हामीले पनि त्यही नीति अख्तियार गर्दा फरक नपर्ला नि भन्दै रेडक्रस अभियान्ताहरुले आक्रोश व्यक्त गरेका थिए ।

यस किसिमको विवादित अभिव्यक्तिका बारेमा नेपाल रेडक्रस सोसाइटी काभ्रे शाखाका मन्त्री उद्धवप्रसाद पौडेलसँग प्रतिक्रिया माग्दा यी सामान्य विषय भएका र उहाँहरुको असन्तुष्टीका बारेमा आफूहरु जानकार भएको बताउनुभएको छ । जति पनि आरोपहरु आएका छन् यी मिथ्या हुन् । “माछा देख्दा दुलाहात, सर्पदेखि बाहिर हात” जस्तै हो उहाँहरुको असन्तुष्टी भन्नुभयो । नेपाल रेडक्रस सोसाइटी काभ्रे शाखा र वीपी नेत्र प्रतिष्ठानको साझेदारीमा युएस आईडीको आर्थिक सहयोगमा काभ्रे जिल्लाका २० वटा विद्यालयहरुमा यस किसिमको कार्यक्रम सञ्चालन हुने भएको छ । उक्त कार्यक्रम अन्तर्गत आँखा, नाक, कान, घाँटी समेतको शिविर राख्ने र सहपाठीद्वारा दृष्टि जाँच भन्ने कार्यक्रम लिएर आएको उहाँले बताउनुभयो ।