राहतको नाममा नेपालीमाथि आहत नहोस् !

सरकारले कोरोना भाइरसका कारण प्रभावित हुन पुगेको जनजीवनलाई राहत प्रदान गर्ने नाममा लकडाउनलाई खुकुलो पारेर राहत प्रदान गरेको बताएको छ ।

तर, प्रत्यक्ष अप्रत्यक्ष रुपमा सहजतालाई दुरुपयोग गर्ने काम नेपालीहरुले गरिरहेका छन् । जसको प्रत्यक्ष प्रभाव सडकमा देख्न सकिन्छ । अहिले सडकमा सार्वजनिक र स्कूल बस बाहेक अधिकांश यातायातका साधनहरु निर्वाह रुपमा चलेका छन् । यस किसिमको प्रवृत्तिले के संकेत गर्छ ! यसका बारेमा चर्चा परिचर्चा गर्नुपर्ला जस्तो लाग्दैन । यो गतिविधिले नेपालीलाई सोमालियाको उदाहरण दिने वर्गका लागि आफ्नै आँखा अगाडि प्रत्यक्ष झल्को मेट्नेमा दुई मत नहोला ।

अहिलेको यो समस्याले नेपाली मात्र प्रभावित भएका पक्कै होइनन् । कुनै पनि निर्णय लिनु अगाडि त्यसले दीर्घकालिन रुपमा पार्ने असरका बारेमा विश्लेषण गर्नु बुद्धिमानी हुने थियो तर दुःखका साथ भन्नुपर्छ, नेपालका नीति निर्माताकर्मी भनौं या नेतृत्वहरु क्षणिक व्यक्तिगत फाइदा भन्दा माथि उठ्न सकेको तथ्य अहिलेसम्म भेटिएको छैन जसको परिणाम अहिले एकाएक शहरमा प्रशस्तै नयाँ अनुहार देख्न पाइन्छ । कतै राज्य सञ्चालकहरुको लहलहैले राहतका नाममा नेपाली जनतामाथि आहत हुने त होइन भन्ने चिन्ताले तमाम बौद्धिक वर्गलाई ग्रसित पारेको छ । यो समस्याले पक्कै पनि आफूलाई मात्र पोल्ने छैन, समग्र मानवीयतालाई नै तहसनहस नबनाउला भन्न सकिन्न ।

राज्यका सञ्चालकहरुले जुन चुनौती उठाएका छन्, त्यसले कालान्तरमा गएर कालो दिनको रुपमा नमेटिने छाप नछोडोस् । त्यसैले अहिलेको यो महामारीलाई कमजोर नसम्झन फेरि एकपटक नेपाली जनता आग्रह गर्दछन् । विश्व स्वास्थ्य संगठनले समेत अबको निशाना एशियाली मुलुक भनिरहँदा नेपालका राज्य सञ्चालकहरुले जुन किसिमको हेलचेक्र्याईं गरेका छन्, त्यो क्षम्मे नहुन सक्छ । भोलि गएर न्याउरी मारी पछुताउनु भन्दा समयमै बुद्धिमत्तापूर्ण निर्णय लिनु व्यवहारिक हुनसक्छ । तसर्थ, अहिलेको यो जटिल अवस्थामा नेतृत्वले सावधानीपूर्वक कदम चाल्नु बुद्धिमानी ठहरिने हाम्रो निचोड छ । त्यो नै नेपाली जनताले अपेक्षा गरेका छन् ।