सरोकारवाला निकायमा यो रोगको अन्त्य कहिले ?

ढाडखोला/रातको १२ बजेर ५७ मिनेट पार गर्दैछ । मुसलधारे पानी परिरहेको छ । लाउन त रेनकोट लगाएको छ तर लुत्थ्रुक्कै मुसो रुझे झैं रुझेर हातमा टर्च लाइट लिएर बिच सडकमा उभिएको व्यक्ति अरु कोहि नभएर ड्युटीको प्रहरी ।

स्टेरिङमा बसेका चालक भन्छन्, कस्तो रहेछ पैसा ! यसले कतिलाई मा¥यो, कतिलाई मालामाल बनायो । यो यसरी मुसलधारे पानीमा बसेर हामीबाट अवैध रकम असुल्छ । हिस्सा लिनेहरु यतिबेला कति मोजमस्तीमा होलान् है सर भन्दै ठट्यौली पारामा मसँग गफ गर्दागर्दै प्रहरी छेउ आइपुगिन्छ । ड्युटीमा बसेको प्रहरीको आवाज आउँछ, के छ दाजुभाइ ? चालकले खिसिक्क हाँसेर यस्तै त हो नि भन्दै हातमा हात जोडेर अघि बढ्छन् ।

फेरि हाम्रो संवाद सुरु हुन्छ, देख्नुभो सर ! यहाँले यो त एउटा टे«लर मात्रै देख्नुभो, इन्ट्री गर्न काउन्टरमा गयो भने मोलमोलाइ गरेर बस्नुपर्छ । भनेजति दिनुपर्ने अवस्था आउँछ, यस्ता त बाटोमा पर्ने अधिकांश पोष्टहरुको दैनिकी हो । अझै भन्नुपर्दा हर्कत नै हो । यति भन्दा नभन्दै दैनिक कति वटा टिपर चल्छन् भनेर सोधें । जवाफ आयो, लगभग १५ सय २ हजार सम्म हुनुपर्छ सर ।

मैले तत्कालै, त्यसो भए कति पैसा कमाउँछन् त ? सामान्यतयाः ८/१० लाख होला नि सर, जवाफ आयो । मसँग कुनै शब्द भएन ! म निःशब्द रहें ।के भो सर ? म झसंग भएँ ! केही नाइँ भनें । किन सर ? यो मुलुकमा कसको भर गर्ने ? कर्मचारी, सुरक्षाकर्मी, राजनीतिकर्मी कसैमाथि पनि भरोसा रहेन । मलाई अलिअलि याद छ ! मेरा हजुरबुबा उतिबेला राणाकालका सेनाको हवल्दार । उहाँले भनेको झल्झली स्मरण हुन्छ, सेना र प्रहरीमा अनियमितता हुँदैन भन्थे, इज्जत थियो, सम्मान थियो, प्रतिष्ठा थियो, सबैको भरोसा उनीहरुमै थियो तर आज सबैभन्दा बढी तिनै निकायहरुमा अनियमितता मौलाएको देख्दा विरक्त लाग्छ ।

जहाँ–जहाँ इन्ट्री गर्न गइन्छ, त्यहाँ निकै मोलमोलाइ गर्नुपर्छ भन्दा मेरा साखा सन्तानले ती निकायमा प्रवेश नगरोस् भन्ने कामना गर्न पुग्छु । फेरि चालकका अभिव्यक्ति सुनिरहँदा हाम्रा कमी कमजोरी केही चाहिँदैन सर, बहाना कति जन्मिन्छन्, कति जन्मिन्छन्, लेखाजोखा नै हुँदैन । बरु त्यसो गर्नुभन्दा उही उपभोक्ताकै टाउकामा ठोकिने हो भन्दै दिँदै आएका छौं । यिनीहरुलाई कुनै कानून लाग्दैन, यिनीहरु कानूनभन्दा माथि छन् । एकपटक अति भएर हुनुपर्छ अख्तियारले केहीलाई समात्यो, त्यो नौटंकी जस्तै भयो ।

अझ लकडाउनको समयमा पास त थियो नि ! प्रहरीमा जति बाहाना कसैसँग हुँदैन, पास भएपनि प्रति पोष्ट १ हजार देखि १५ सयसम्म दिँदै सामान उपभोक्तासम्म पु¥याएको स्मरण गर्दै अहिले अनियमितता हुन्छ त सबैभन्दा बढी प्रहरीमा हुँदै आएको छ अनि सेनामा भन्दै उनी पनि भावुक हुँदै यदि हजुरलाई बलियो प्रमाण चाहिन्छ भने रासन ठेकेदारसँग सम्पर्क गर्नुस्, सब भेट्नुहुन्छ । एकाउण्टेण्ट मार्फत् कहाँसम्म सेटिङ मिल्छ त्यो सबै खुल्छ, तब थाहा पाउनुहुन्छ । त्यसैले मलाई त लाग्छ नेपालमा अब हिटलर जन्मनुपर्छ । नत्र यस्तै हो, कहिल्यै सुध्रिदैनन् सर । तपाईले चिन्ता लिएर केही हुन्न भन्दाभन्दै रातको २ बजेर १३ मिनेट गएछ । म मेरो गन्तव्य आइपुगें बनेपा । उहाँहरु आफ्नो गन्तव्यतर्फ लाग्नुभयो ।

अहिले बजारमा निर्माण सामग्री अन्तर्गत गिट्टी, बालुवा लगायतका सामानको मूल्य अधिक रुपमा रहेको र आम उपभोक्ताहरुको गुनासोलाई सम्बोधन गर्ने क्रममा यसको उत्पादन र बिक्रि स्थलदेखि उपभोक्तासम्म आइपुग्दाको स्थलगत अध्ययन गर्ने क्रममा गत शुक्रबार बनेपाबाट ढाडखोला र शनिबार बनेपाबाट दोलालघाट आसपासका क्षेत्रहरुको अध्ययन गर्ने क्रममा भेटिएका यथार्थलाई चित्रण गर्ने जमर्काे गरिएको छ ।