पैसासँग मात्र सम्बन्ध राख्नेहरुबाट बचौं

यतिखेर कोरोनाले विश्व नै आक्रान्त भइरहेको छ । त्यसका छिट्टा नेपालमा पनि परेका छन् । जसका कारण नेपाल यो अवस्थामा इटाली हुने त होइन भन्ने चिन्ता प्रत्येक नेपालीमा परेको छ । नेपाली जनता यसैको पिरोलोमा रुमलिएका छन् । जुन पिरोलोलाई पुष्टि गर्न कोरोनाले आफ्नो भएभरको शक्ति प्रयोग गरेको छ । यो संगीन घडिमा हाम्रो देशलाई कोरोनाबाट मुक्त गराउने दायित्व हामी नेपाली र त्यसभित्र पनि स्वास्थ्यकर्मी र सुरक्षाकर्मीको विशेष दायित्व हुन्न र ? यो गम्भीर प्रश्न हामीबीच खडा भएको छ ।

यो संकटको अवस्थामा कालो बजारीयाहरुको चहलपहल पनि चर्कै रुपमा मौलाएको पाइन्छ । तरकारी, खाद्यान्न, औषधी आदि–आदि ढुवानी भनेर पोष्टर टाँसेर अवैध धन्दा सञ्चालन गर्नेहरुको जमात ठूलै छ भन्ने पुष्टि हुँदै आएको छ । मुलुक गम्भीर संकटमा परिरहेको अवस्थामा माफियाहरुले यसलाई लुट्ने अवसरको रुपमा लिएका छन् । सडकमा बिना रोकतोक हुइकिने चिल्ला कालो सिसाको गाडीभित्रको व्यवसायका बारेमा यतिखेर कसले चासो दिने ? कालो सिसाभित्र तिब्बतीयन नागरिक हो कि अफिम हो । ड्युटिमा रहेको सुरक्षाकर्मीलाई माथिको आदेशै काफी छ । भर्खरै प्रहरीले बेवारिसे अवस्थामा भेटिएको भनेको नगद र बरामद गरेको लागू पदार्थले माफियाहरुको क्रियाकलापलाई पुष्टि गर्दैन र ?

अर्काेतर्फ केही व्यवसायीहरुलाई कुनै किसिमको निषेधाज्ञाले छेक्दैन । उनीहरु निर्वाद रुपमा अति आवश्यक सामान खाद्यान्नका नाममा विभिन्न किसिमका निषेधित वस्तुहरुको कारोबार गर्न पनि पछि परेका छैनन् । उनीहरुका लागि कोभिड–१९ एक सुनौलो अवसर बनेर आएको छ । मात्रै उनीहरुलाई पैसासँग सम्बन्ध छ । कोरोनाको कुनै चासो छैन । त्यसैले पैसासँग मात्र नाता गाँस्नेहरुकै कारण आज यो मुलुकले यो अवस्थाको सामना गर्नु परिरहेको छ । त्यसैले अति आवश्यकताका नाममा हुने कारोबार नै आजको समस्याको मूल जड हो । जबसम्म अति आवश्यक सामानको ब्राण्ड राखेर राज गरिरहन्छन्, तबसम्म कुनै किसिमका बार बन्देजहरुले सार्थकता प्राप्त गर्न सक्दैन । तसर्थ, फेरि पनि आग्रह छ, पैसासँग मात्र सम्बन्ध राख्नेहरुबाट बचौं, तब मात्र यो भयानक महामारीबाट उन्मुक्ति प्राप्त हुनेछ भन्ने ठम्याई हाम्रो छ ।