असहायको आश्रय स्थल मानव कल्याण समाज

धुलिखेल/खुल्ला आकाशमुनिको आश्रयमा जीवन बिताउन विवश असहायहरुको लागि मानव कल्याण समाज सारथी बनेर आएको छ ।
गत शुक्रबारबाट विधिवत् रुपमा सेवा प्रवाह गरेको समाजले एक कार्यक्रम बिच जानकारी गराएको छ । भक्तपुरमा केन्द्रीय कार्यालय रहेको समाजले सडकको जीवन व्यतित गर्न विवश असहायहरुका लागि गाँस, बास, कपास, सीप र रोजगारी समेतको व्यवस्थापन सहित सेवामा समर्पित हुने जानकारी समाजले गराएको छ । काभ्रे जिल्लामा धुलिखेल नगरपालिका वडा नं. ४ बाँसघारीबाट आफ्नो सेवा प्रवाह हुने समाजले जनाएको छ । समाजले सडकमै आश्रितहरुका लागि स्वास्थ्य, शिक्षा, रोजगारीको योजनाका साथ सेवा प्रवाह गर्ने प्रतिबद्धता समाजका अध्यक्ष सुमित्रा चौलागाईंले बताउनुभएको छ । विनाशकारी भूकम्पपछि खुल्ला आकाशमुनि आश्रित हुनेको संख्या सडक पेटीमा दिनप्रतिदिन बढ्दै गएकोले यो जटिल समस्याको समाधान खोज्ने क्रममा यो समाजको जन्म भएको खुलासा समेत अध्यक्ष चौलागाईंले गर्नुभएको थियो ।
उहाँका अनुसार अहिलेसम्म समाजले झण्डै २ सयको हाराहारीमा सडक पेटीमा आश्रित असहायहरुको पुनर्जीवन दिएको र काभ्रे शाखाले पनि एक हप्ता नबित्दै १३ जना सडक पेटीमा आश्रितहरुको उद्धार गरेको बताउनुभएको छ ।
समाजमा केही गरौं भन्ने भावना बोकेका सामाजिक अभियान्तामार्फत् सञ्चालनमा आएको “सेवा घर” ले उद्धार पश्चात् आश्रितहरुलाई सक्षम बनाएर पारिवारिक वातावरणमा घुलमिल हुनसक्ने क्षमता सिर्जना गरी परिवारसँग मिलन समेत गराउँदै आएको अध्यक्ष चौलागाईंको कथन थियो । आफ्नो वडामा मानवीय भावना बोकेको परोपकारी संस्था खुलेकोमा धुलिखेल वडा नं. ४ का वडा अध्यक्ष रविन्द्र कर्माचार्यको कथन थियो– समाजमा विभिन्न रुप, रंग बोकेका कागजी प्रतिवेदनले झोला भरेका गैर सरकारी संस्थाहरुका अगाडि मानव कल्याण समाज जुन उद्देश्य सहित आएको छ, यसले ति नामधारी संस्थाहरुलाई चुनौती दिने विश्वास आफूले लिएको बताउनुभएको छ । काभ्रे जिल्लालाई कर्मठ थलो बनाउने जमर्काे सहित सडक पेटीमा आश्रितहरुको सारथी बन्ने जर्मको सहित आएको यसले आफ्नो लक्ष्य पूरा गर्ने विश्वास राखेको छु ।
त्यसैले काभ्रे जिल्लामा अलपत्र परेका बेवारिसे जीवन बिताइरहेका असहायहरुले नयाँ जीवन पाउनेमा आफू विश्वस्त भएको अध्यक्ष कर्माचार्यले भेटमा बताउनुभएको छ । समाजले जुन प्रतिबद्धता जनाएर सेवामा समर्पित भएको छ, त्यो प्राप्तिका लागि वडाबाट सक्दो सहयोग हुने वचनबद्धता समेत व्यक्त गर्नुभएको छ । “सेवा घर” ले पक्कै पनि यो क्षेत्रमा अनुकरणीय सेवा प्रवाह गर्ने विश्वास दिलाएको छ । हुने बिरुवाको चिल्लो पात भनेझैं मानव सेवा समाजले आगमनले नै वडावासीको मात्र नभई जिल्लावासीकै मन जित्न सफल भएको मनन गरेको छु ।
आगामी दिनमा आफ्नो यो उचाईलाई निरन्तर कायम राख्नेछ भन्ने अपेक्षा आफूले लिएर वडा अध्यक्ष कर्माचार्यले बताउनुभएको छ ।