सामाजिक दूरीका कायम गर्दै मासिक कर्मचारी बैठक

बहादुरगंज, कपिलबस्तु । छन्द (कालेबाबु) नारायणी आँखा अस्पताल, बहादुरगंज, कपिलबस्तुले सामाजिक दुरी कायम गर्दै नियमति कर्मचारी बैठक तथा बिजया दशमी, शुभ दीपालवली तथा छठ पर्व २०७७ को शुभकामना आदान प्रदान कार्यक्रम गत शुक्रबार सम्पन्न भएको छ ।
नेपाल नेत्रज्योति संघ, आँखा स्वास्थ्य कार्यक्रम राप्ती तथा बहादुरगंज अन्तर्गत संचालित छन्द (कालेबाबु) नारायणी आँखा अस्पताल, बहादुरगंजका नेत्र विशेषज्ञ डा.रबिन्द्र सिंह ठकुरीको अध्यक्षतामा भएको सो कर्मचारी बैठक तथा शुभकामना आदान प्रदान कार्यक्रममा बोल्दै डा. ठकुरीले कोभिड १९ को यस बिषम परिस्थितिमा पनि सुरक्षाका सबै सावधानीहरु अपनाएर यस अस्पतालले नियमित रुपमा सेवा प्रवाह गरिरहेकोे र कुनै पनि बिरामीहरुलाई नफर्काएको बताएका छन् । उहाँले नेपालका कतिपय स्वास्थ्य प्रदायक संस्थाहरुका प्रायजसो कर्मचारीहरु कोरोना संक्रमित हुंदा स्वास्थ्य संस्था नै सिल तथा बन्द गर्नु परिरहेको प्रसंग उल्लेख गर्दै कोरोनासँगको लडाईमा अस्पतालका प्राविधिक कर्मचारी, प्रशासनिक कर्मचारीका साथै अस्पताल व्यवस्थापन समितिका पदाधिकारीहरुको संयुक्त प्रयास र कार्यकुशलताका कारण अस्पतालले नियमित सेवा प्रवाह गर्न सक्षम रहेको बताउनुभएको थियो । यसको लागि उहाँले अस्पताल व्यवस्थापन समितिका पदाधिकारीहरुलाई धन्यवाद समेत कार्यक्रममा दिनुभयो ।
अस्पतालको नियमित कर्मचारी बैठकमा विभिन्न बिभागका डिपार्टमेन्ट इन्चार्जहरुले भदौ महिनाको मासिक प्रगति प्रतिवेदन समेत पेश गरेका थिए । जस अनुसार भदौ महिनामा मात्र अस्पतालले १ हजार ६ सय ३२ जना आँखाका बिरामीहरुलाई ओ.पि.डि सेवा प्रदान गरेकोमा ७९ जनाको मोतिबिन्दुको शल्यक्रिया गरेको ओ.पि.डि इन्चार्ज ओपेन्द्र चन्दले बताउनुहुँदै ल्याब टेक्निसियन देबराज शर्माले ४ सय ७७ जनालाई ल्याब सेवा प्रदान गरिएको जानकारी गराउनुभएको थियो । त्यसैगरी भदौ महिनामा ९० जना कानका विरामीहरुले सेवा लिएको नेत्र सहायक सरताज हुसेनले बताए । कृष्णनगर रिफरल सेन्टरले भदौ महिनामा १ सय ४२ जनालाई ओ.पि.डि सेवा प्रदान गरेको सेन्टरका इन्चार्ज रजनिश श्रीवास्तवले उक्त अवसरमा बताएका थिए । सो अवसरमा भदौ र असोज महिनाको आम्दानी तथा खर्चको विवरण लेखा सहायक कमल चौधरीले प्रस्तुत गरेका थिए भने कार्यक्रमको सञ्चालन प्रशासकीय अधिकृत जसराज विश्वकर्माले गरेका थिए ।