मान्यजनबाट टिका र जमरा थाप्ने भीड कम रहेन

बनेपा । २०७७ सालको विजया दशमीको टिका राष्ट्रपति विद्यादेवी भण्डारीले आफ्नी आमाको हातबाट सोमबार बिहान १०ः१९ को साइतमा टिका लगाउनुभएको छ । यो पटक कोरोना संक्रमणका कारण सर्वसाधारणलाई भने राष्ट्रपतिबाट टिका तथा जमरा प्रदान भएन ।
टिकाको साइतमै टिका लगाउनुपर्छ भन्ने मान्यता भएता पनि कोजाग्रत पूर्णिमासम्म नवदुर्गाको प्रसाद र मान्यजनबाट आशिर्वाद थाप्नेको लर्काे नै लाग्ने गर्छ । विशेष गरी रातो टिका र समृद्धिको प्रतिकका रुपमा पहेंलो जमरा लगाउने प्रचलन रही आएको छ तर यो वर्ष कोरोना संक्रमणका कारण बजारमा चहलपहल घटेको देखिएता पनि मान्यजनहरुकहाँ पुग्नेहरुको भीड भने कम छैन ।

कोभिड–१९ को सन्त्रासमा रुमलिएको दैनिकीबाट केही फड्को पार गर्दै २०७७ सालको दशैं पनि नेपालीजनहरुले जहाँ छन्, त्यहीँ मन खोलेरै मनाएको पाइयो । अझ कति त माथि उल्लेख भएजस्तै अनुच्छेद कदर गरेको प्रशस्तै भेटिएका छन् । सार्वजनिक यातायातमा त्यति चाप नदेखिएता पनि व्यक्तिगत रुपमा भाडाका रिजर्भ गाडिहरु गत वर्षका दशैंमा भन्दा बढि नै खपत भएको व्यवसायीहरुको प्रतिक्रिया छ । अधिकांशले दुई पांग्रे साधनको प्रयोग गरेको भएता पनि चार पांग्रे भाडाका गाडीहरुको प्रयोग अधिक भएको चालक पञ्च तामाङ बताउँछन् ।

त्यसैगरी लामो समयदेखि आफ्नै चार पांग्रे गाडि चलाइरहेका चालक बद्री श्रेष्ठको कथन छ– यो पटक कोरोनाको कारणले होला, हाम्रा लागि टिप राम्रै भएको छ । भाडामा यात्रुहरुले कुनै किसिमको कचकच गरेका छैनन् । मागेको भाडा चुपचाप दिनुभएको छ । यसबाट के पुष्टि हुन्छ भने यात्रुहरुका लागि भाडाका गाडिको आवश्यकता बढि भएको देखिन्छ । त्यो नपुग भएकै कारण उहाँहरुलाई गाडि भए पुग्यो । त्यसले पनि भाडामा मोलमोलाई नभएको हुनुपर्छ । चालक श्रेष्ठ थप्छन्, फाटफुट चलेका सार्वजनिक यातायातले पनि अरु दिनको भन्दा आज डबल तेब्बर भाडा लिएको यात्रुहरुको गुनासो सुनेको छु । यो अवसरवादी चरित्र देखाउनु ठिक भएन । हामी पनि ड्राइभर हौं, ड्राइभरको आलोचना आउँदा कता–कता नरमाइलो लाग्छ । यो अवसरवादी चरित्र देखाउनु ठिक होइन । बरु नचलाएको भए हुन्थ्यो नि । एकदिनको व्यवहारको आलोचना बोकेर भाडा असुल्नु सान्दर्भिक लागेको छैन भन्छन् श्रेष्ठ ।

यस्तै मान्यजनबाट टिका र आशिर्वाद थाप्न सिन्धुलीको जरायोटार घर बताउने सिता बस्नेत अर्काे साल के हो के हो भनेरै अग्रजहरुको मुख पनि हेरौं, आशिर्वाद पनि थापौं भनेर उति टाढादेखि आइरहेको छु । साँझसम्म त कसो नपुगिएला भन्नुहुन्छ । त्यसै त तपाईं स्वास्थ्यकर्मी सरकारले त्यत्रो निर्देशन गरेको छ अवज्ञा गर्न मिल्छ ? भन्दा सरकारको कुरो आफ्नो ठाउँमा छ । उहाँहरुको अनुकूलतामा के के निर्णय गर्छन् त्यसतर्फ त्यति चासो राख्नु मनासिव ठानेको छैन । हुन त म सरकारी कर्मचारी, त्यसो भन्नु न्यायसंगत नहोला तर जनचाहना अनुसार २÷४ किलोमिटर बाटो खन्नु, केही पुलपुलेसा बनाउनु मात्रै ठूलो कुरो होइन । जनचाहनाअनुसार उनीहरुको जीवनसँग सरोकार राख्ने के नै राम्रा काम गरेका छन् र ? यदि सुरुमै कोरोनाको बारेमा राम्रोसँग बुझाएर लकडाउनको अर्थ राखिदिएको भए आज यो अवस्था आउने थिएन । सुरुमा गर्नुपर्ने क्रियाकलाप आज आएर भएका छन्, जसको परिणाम मुलुकले यो दुर्दशा व्यहोर्नु परेको छ । जतिबेला नेपालीजनलाई राहतको खाँचो छ, त्यतिबेला पानी पनि पाएनन् । जति बेला बन्द गर्नुपर्ने थियो, त्यतिबेला त्यता चासै गएन । अहिले जुन नाटक मन्थन भएको छ, त्यो एउटा देखाउने पाटो बनेको छ । त्यसैले म आफूले आफैंलाई धिक्कार्छु भन्नुहुन्छ बस्नेत । किन धिक्कार्नुहुन्छ भन्ने प्रतिप्रश्नमा बस्नेत थप्नुहुन्छ– अतित केलाउँदै निर्वाचन ताका फाटेका जुत्ता, खाएको पिडा सुनाउन पछि पर्नु हुन्न ।

“आउने साल मरिन्छ, बाँचिन्छ, यो पटक त धित् खोलेरै नाचिन्छ” भनेझैं जो जहाँ रहेको छ, त्यहिँ नै बाट धित् खोलेर २०७७ को दशैं मनाएको यात्राका अधिकांश बटुवाको तर्क छ । काठमाडौं जोरपाटी घर बताउने सुमित्रा पुडासैनी भन्नुहुन्छ– कोरोनाले आफ्नो र पराई भन्दैन, अर्काे साल के हो के हो ! कोरोनाले यति धेरै सताएको छ, आफ्नै ठेगान छैन, त्यहि भएर पनि आफ्ना मान्यजन जो वृद्धवृद्धा हुनुहुन्छ, चुनौती उठाएरै आशिर्वाद थाप्न आएको बताउनुहुन्छ । साङ्ले खोला घर बताउने पुनम सुवेदी– जसले जे भनोस्, सुरक्षित तवरले टिका थाप्ने जमर्काे गरेरै गाडि रिजर्भ लिएर आफ्नो परिवार सहित आएका छौं । सार्वजनिक यातायातमा यात्रा गर्दा जोखिम भएकै कारण अन्य बेलाको भन्दा दोब्बर भाडा तिरेर रिजर्भ लिएर आएका हौं । पैसा ठूलो कुरो भएन, मान्यजनहरुबाट प्राप्त हुने आशिर्वाद नै महत्वपूर्ण पक्ष हो । त्यसैले यो बेला खर्चमा कञ्जुस्याईं गर्नु उचित लाग्दैन भन्नुहुन्छ सुवेदी ।

काभ्रेको तेमाल गाउँपालिका वडा नं. ३ घर बताउने विपना लामा भन्नुहुन्छ– हामी गाउँघरमा रहेका छौं, जान पनि गाउँबस्तीमै पुग्ने हो । त्यसैले पनि हाम्रो उपस्थितिमा समस्या रहन्न भनेर लागेरै आफूभन्दा माथिका मान्यजनबाट टिका र आशिर्वाद थाप्नकै लागि महँगो भाडा तिरेर टिका थाप्न हिँडेका छौं । पहिलाको दशैं तिहारभन्दा यो पटकको गाडि भाडामा अधिक महँगो भएको रहेछ । किन होला यति महँगो गरेको भन्नुहुन्छ बटुवा तामाङ । यता यातायात व्यवसायीको तर्क छ– सार्वजनिक यातायात कम चलेको कारण यात्रीहरुमा केही मर्का परेको साँचो हो ।

तस्वीरः सामाजिक सञ्जाल