धुलिखेल । नितान्त नेपालीहरु मात्रको साथ, सहयोग र सहभागिता (मुठ्ठी दान) बाट सञ्चालित मानव कल्याण समाज (सेवा घर) काभ्रे शाखाले गत शुक्रबार धुलिखेलमा आयोजित सामूहिक टिका ग्रहण तथा सामूहिक भोजन कार्यक्रमलाई सम्बोधन गर्ने क्रममा कार्यक्रमका प्रमुख अतिथि एवं बेथानचोक गाउँपालिका ढुंखर्कका उपाध्यक्ष सरिता लामिछानेले गाँस काटेर गरेको मानवीय सेवाले नै आत्मसन्तुष्टि दिने बताउनुभएको छ ।
कार्यक्रमलाई सम्बोधन गर्दै प्रमुख अतिथि लामिछानेको तर्क थियो– राज्यले आफ्नो उपस्थिति जनाउनुपर्नेमा नागरिकको तहबाट जुन किसिमको अनुकरणीय प्रयास भएको छ, त्यसलाई सम्मान गर्दै मानव कल्याण समाजले आवश्यकता महसुस गरेकोमा गाउँपालिका परिवार यस किसिमको मानवीय सेवामा सहकार्य गर्न तयार रहेको छ । मानवीय सेवा केही कमाउन गर्ने होइन, यसले त हामी मानवलाई जिउन मार्ग प्रशस्त गर्दछ । यसबाट एक प्रकारको आत्मसन्तुष्टि मिल्दछ । त्यसमा पनि आफू राजनीतिकर्मी भएको चर्चा गर्दै राजनीतिमा मानवीय सेवाले अत्यन्तै महत्वपूर्ण भूमिका खेल्दो रहेछ । यसको प्रभाव कस्तो हुन्छ भनिराख्नु नपर्ला भन्नुहुँदै आफूले राजनीतिक यात्रामा भोगेका वृत्तान्त पस्कँदै प्रमुख अतिथि लामिछाने थप्नुहुन्छ “आकाशलाई छानो, जमिनलाई ओछ्यान बनाएर दैनिकी काटिरहेकाहरुका लागि मानव कल्याण समाजले उठाएको चुनौतीको सम्मान नगरिरहन नसकिने विषय भएको छ ।” यसमा पाउनु छ त आत्मसन्तुष्टि मात्र हो । जुन कोभिड–१९ महामारीका बिचमा सेवा विस्तार गर्ने क्रममा काभ्रे जिल्लालाई छनौट गर्नुभयो, त्यसका लागि काभ्रेली जनप्रतिनिधिको तर्फबाट मानव कल्याण समाजप्रति साधुवाद व्यक्त गर्दछु ।

यस सेवा विस्तारका क्रममा पक्कै पनि चुनौती आएको संस्थाको परिचय पस्कने क्रममा ज्ञात भइसकेको छ । ति चुनौतीमा यहाँहरुले आवश्यक महसुस गरेमा मलमपट्टि लगाउन बेथानचोक गाउँपालिका पछि नपर्ने धारणा पनि प्रमुख अतिथि लामिछानेले राख्नुभएको थियो ।

हामी हातेमालो गर्न तयार छौं ः अध्यक्ष कोजू

नितान्त नेपालीहरु मात्रको साथ, सहयोग र सहभागिता (मुठ्ठी दान) बाट सञ्चालित मानव कल्याण समाज (सेवा घर) द्वारा आयोजित सामूहिक टिका ग्रहण कार्यक्रममा आश्रितहरुलाई कोसेली सहित उपस्थित हुन पुग्नुभएका धुलिखेल उद्योग वाणिज्य संघ धुलिखेलका अध्यक्ष मञ्जुकुमार कोंजूको तर्क थियो– धुलिखेलवासी मानवीय सेवाका लागि एक कदम अगाडि नै रहेर सेवामा जुट्ने संस्कार बोकेर आएको चर्चा गर्नुहुँदै मानव कल्याण समाजले आवश्यकता महसुस गरे आफूहरु हातेमालो गरेर अगाडि बढ्न तयार रहेको बताउनुभएको थियो ।

धुलिखेल उद्योग वाणिज्य संघको स्थापना नै मानवीय सेवामा समर्पित हुने मूल उद्देश्यका साथ भएको हो । यसले पनि धुलिखेलवासीको आचारण खुल्छ । नितान्त संस्थागत रुपमा सेवा गर्ने ध्येयका साथ स्थापना गरेका हौं । हुन त नामले व्यवसायिक हक, हित भनिएता पनि व्यवहारिक रुपमा धुलिखेल नगरमा रहेका व्यवसायीहरुको चाहना व्यवसायको साथमा मानवीय सेवा नै हो ।
जसरी भक्तपुरवासीको मुठ्ठी दानबाट यो संस्थाले आफ्नो सेवा विस्तारको क्रममा काभ्रेसम्म आइपुगेको छ, त्यसैगरी अब धुलिखेलवासीको साथ जोडिनेछ । तपाईं सञ्चालकहरुले जुन भूमिलाई रोज्न पुग्नुभयो, त्यसप्रति धुलिखेल उद्योग वाणिज्य संघ ऋणी भएको छ । त्यसैगरी हामी जिल्लामा मात्र होइन, देशविदेशमा छरिएर रहेका धुलिखेलेहरु भनेर परिचितहरुको साथ र सहयोग मानव कल्याण समाजमा आश्रितहरुको लागि रहनेछ । जहाँ जहिले पनि धुलिखेल एक मतले मानवीय सेवामा प्रस्तुत भएको अभिलेखलाई जीवन्त राख्न हामी पछि पर्ने छैनौं । जसको नमूना यहाँहरुले धुलिखेल अस्पताललाई लिन सक्नुहुनेछ समेत अध्यक्ष कोंजूले भेटमा बताउनुभएको छ । यो मानव कल्याण समाजले कार्यक्षेत्रका रुपमा काभ्रेको पनि धुलिखेललाई रोज्यो, त्यसैगरी हाम्रो पनि समाजप्रति दायित्व बढेको सम्झेको ठानेको छु भन्नुभएको छ ।
उक्त अवसरमा धुलिखेल नगरपालिका वडा नं. ३ को नेपाली कांग्रेस वडा सभापति जगन्नाथ गिरी, मानव अधिकार संगठन काभ्रेका अध्यक्ष राजु सिग्देल, अभियान्ता सुशिला चौलागाईं रिमाल, समाजका अध्यक्ष सुमित्रा चौलागाईं लगायतले मानव कल्याण समाजले चालेका पाइलाहरुका बारेमा प्रष्ट्याउँदै आ–आफ्नो क्षेत्रबाट सक्दो सहयोग पु¥याउने वचनबद्धता व्यक्त गर्नुभएको थियो । कार्यक्रममा प्रमुख अतिथिद्वारा सामाजिक अभियान्ता आश्रित आमाबुबा, छोराछोरी, सेवक सेविकाहरु र अतिथिहरुलाई टिका र आशिर्वाद प्रदान गरिएको थियो ।
त्यसैगरी प्रमुख अतिथि लामिछानेबाट दैनिक उपभोगको लागि अति आवश्यक पर्ने ग्यासचूलो, सिलिण्डर सहितको सेट, म्याट एक रोल र उक्त दिनको भोजनको समेत सम्पूर्ण व्यवस्थापन गर्नुभएको थियो । कार्यक्रमको सञ्चालन अभियान्ता सुशिला चौलागाईं रिमालले गर्नुभएको थियो भने कार्यक्रमको अध्यक्षता संस्थाका अध्यक्ष सुमित्रा चौलागाईंले गर्नुभएको थियो ।