धुलिखेलमा २ सय ९९औं पृथ्वी जयन्ती सम्पन्न

काभ्रे । धुलिखेल उद्योग वाणिज्य संघको आयोजनामा राष्ट्रिय एकता दिवस तथा २ सय ९९ औं पृथ्वी जयन्ती धुलिखेलको सरस्वती बजारमा सम्पन्न भएको छ ।

उक्त कार्यक्रममा धुलिखेल उद्योग वाणिज्य संघका अध्यक्ष मञ्जुकुमार कोजूले राष्ट्र निर्माता श्री ५ वडामहाराजाधिराज पृथ्वी नारायण शाहको तस्विरमा माल्यार्पण गर्दै राष्ट्र निर्माणमा पृथ्वी नारायण शाहको योगदानको बारेमा चर्चा गर्नुहुँदै हालको नेतृत्वले उहाँप्रति हेर्ने दृष्टिकोण परिवर्तन हुन आवश्यक रहेको स्मरण गराउनुभयो । पुर्खाले जुन किसिमको सन्देश दिएर गएका छन्, त्यो अनुकरणीय छ । पछिल्लो समयका पुस्ताहरुले पूर्वजहरुको अनुशरण गर्न छाडेकोमा दुखेसो व्यक्त गर्दै राम्रा कुराहरुको अनुशरण गर्नुपर्ने र ति कुराहरुको स्थायित्व हुनुपर्ने र त्यसको जिम्मेवारी स्थानीय सरकारले लिनुपर्नेमा, स्थानीय सरकार आफैंमा रनभुल्लमा रहेको उहाँको आरोप थियो । पछिल्लो समय स्थानीय सरकारले जनताको उन्नतिका लागि केही गर्छ भन्ने अपेक्षा लिनु मनासिव नदेखिएको अध्यक्ष कोजूको तर्क पनि थियो । सत्तामा रहेका नेतृत्वहरुको गतिविधितर्फ इन्कित गर्दै पृथ्वीनारायण शाहका अमरवाणीले आज पनि उतिकै महत्व राखेको स्मरण गराउनुहुँदै घुस खान्या र घुस खुवाउन्या दुवै देशद्रोही भन्नुको अर्थ आज पनि स्मरणयोग्य रहेको सम्बोधनको क्रममा अध्यक्ष कोजूले बताएनुभएको थियो ।

कार्यक्रममा उद्योग वाणिज्य संघका पदाधिकारीहरु, स्थानीय वासिन्दा, व्यवसायी, स्वतन्त्र पेशाकर्मी, विद्यार्थी, समाजसेवि, जनप्रतिनिधि तथा नागरिक समाजले माल्यार्पण गरी बजार परिक्रमपश्चात् बडा महाराजधिराज पृथ्वी नारायण शाहप्रति श्रद्धाञ्जली अर्पण गर्दै कार्यक्रमको समापन गरिएको थियो ।