बालबालिकाहरुको माझमा पोशाक सहित अनिला

काभ्रे । आफ्ना स्वर्गीय पिता रामचन्द्र कायस्थको १३औं पुण्यतिथिको अवसर पारेर छोरी अनिला कायस्थले पनौती नगरपालिका वडा नं. ५ धनेश्वरस्थित धनेश्वर महादेव आधारभूत विद्यालयमा अध्ययनरत ८५ जना बालबालिकाहरुलाई विद्यालय पोशाक एक समारोहबीच मंगलबार वितरण गर्नुभएको छ ।
कुनै पनि सन्तानले आफ्ना अभिभावकप्रति देखाउने मोह, श्रद्धा, भावनाहरुलाई पोख्ने क्रममा यस्ता गतिविधि अनुकरणीय हुने विद्यालयका प्रधानाध्यापक महेश्वरी थापा न्यौपानेको कथन छ– आफ्ना पिताको १३औं पुण्यतिथिको अवसर पारेर जुन अनुकरणीय कार्य अनिलाजीले गर्नुभयो, त्यो चर्चा गर्न योग्य रहेको प्रधानाध्यापक न्यौपानेको धारणा थियो । पछिल्लो समय जुर्मुराउँदै गरेको यस विद्यालयमा समाजका विभिन्न प्रतिष्ठित व्यक्तिहरुको सहयोग, सद्भाव बढेको छ । जसको प्रतिनिधि पात्रको रुपमा अनिलाजीले आफूलाई उभ्याउन पुग्नुभएको छ । केही वर्षअघि अस्तित्व समेत गुमाउन पुगिसकेको यो विद्यालय समाजका सकारात्मक सोच बोकेका व्यक्तित्वहरुको अथक प्रयासले आज यो अवस्थामा आइपुगेको प्रधानाध्यापक न्यौपानेको धारणा थियो ।
यता अनिला कायस्थको तर्क थियो– समाजमा अनावश्यक रुपमा हुने फजुल खर्चलाई यस किसिमका सकारात्मक कार्यमा लगाउने हो भने यसले समाज रुपान्तरणमा महत्वपूर्ण फड्को पार गर्नेछ । जुन कुराको सुरुवात आफूले विगतदेखि गर्दै आएको कायस्थको भनाइ थियो । धनेश्वर महादेव आधारभूत विद्यालय पनौतीमा अध्ययनरत ८५ जना बालबालिका सँगै अभिभावकले पनि सकारात्मक रुपमा लिइनेछन् र सामुदायिक विद्यालयप्रतिको मोह बढ्नेछ । जसले गुणस्तरिय शिक्षा प्राप्त गर्न यो अभियान कोसेढुंगा सावित हुने आफूले महसुस गरेको कायस्थको टिप्पणी थियो ।