सम्मान गर्ने परम्पराले पेशाप्रति समर्पण जाग्छ ः तामाङ

नुवाकोट । कृष्णमाया लिलानाथ स्मृति पत्रकारिता पुरस्कारबाट सम्मानित सञ्चारकर्मी शक्तिमाया तामाङले आफ्नो पेशाप्रति कदर भएको पाउँदा अत्यन्तै उर्जा प्राप्त हुनुको साथै सम्मान गर्ने परम्पराले पेशाप्रतिको इमान्दारिता र समर्पण बढ्ने बताउनुभएको छ ।
पत्रकारिताको क्षेत्रमा अनुकरणीय योगदान पु¥याउने सञ्चारकर्मी तामाङ, जसले यो क्षेत्रमा जीवन खोज्नेहरुका लागि सशक्त प्रतिबिम्ब बनेर समाजमा उदाउनुभएको छ । भन्दा अचम्म लाग्न सक्छ, भूगोलले ठगेको म्यगङ भूगोलमा जन्मिएर बिबिसीको रिपोर्टर बन्ने हैसियत मै हुँ भन्नेलाई प्राप्त गर्न मुस्किलै हुन्छ तर तामाङले त्यो हैसियत सहजै प्राप्त गर्न पुग्नुभयो । त्यसका पछाडि उहाँको पेशाप्रतिको लगनशीलता र इमान्दारितालाई लिन सकिन्छ ।
जसको सम्मान गर्न पुगेको छ उत्तरगया दैनिक र जागरण साप्ताहिक परिवार । जसले उर्जाशील जीवनमा थप उर्जा थपिदिने काम गरेको छ । आफ्ना स्थापनाको अवसर पारेर जागरण साप्ताहिकको वार्षिकोत्सव र उत्तरगया दैनिकको चौथो वार्षिक उत्सवको अवसरमा तामाङलाई शुक्रबार कृष्णमाया लिलानाथ स्मृति पत्रकारिता पुरस्कारबाट पुरस्कृत गरिएको छ । पत्रिकाका प्रकाशक तथा सम्पादक शिव देवकोटाको सभापतित्वमा भएको कार्यक्रममा पूर्व स्वास्थ्य तथा शिक्षामन्त्री एवं नेपाली कांग्रेसका नेता अर्जुननरसिंह केसीले सो पुरस्कार पत्रकार तामाङलाई प्रदान गर्नुभएको थियो ।
विगत ८ वर्षदेखि पत्रकारिता पेशामा रहनुभएका तामाङलाई कोरोना संक्रमणको महामारीमा पनि खोजमूलक प्रकाशन, प्रसारणबापत कृष्णमाया लिलानाथ स्मृति पुरस्कार २०७८, सम्मान पत्र दिईएको सम्पादक देवकोटाले बताउनुभएको छ । पुरस्कारको राशि नगद २५ हजारका साथमा प्रमाण पत्र रहेको थियो ।
यसअघि पनि तामाङ मिडिया अवार्ड २०७४ र महिला पत्रकारिता पुरस्कार २०७७ बाट सम्मानित भइसक्नुभएको छ । उहाँ नेपाल आदिवासी जनजाति पत्रकार संघ नुवाकोटका अध्यक्ष तथा हाल तामाङ पत्रकार संघ नुवाकोटको जिल्ला अध्यक्ष समेत हुनुहुन्छ ।