मुक्तक

प्रकाश घायल

१.
कस्तो विडम्बना दाता स्वयं आशको कुरा गर्छन्
कहिल्यै नजोडिने धर्ती र आकाशको कुरा गर्छन्
गहतको झोलमा आफ्नो अस्तित्व मेटाउनेहरु नै
जनताको सामुन्ने अजम्बरी इतिहासको कुरा गर्छन् ।
२.
जिन्दगीका नाप नक्सा भाग्यले मिच्दोरहेछ
उमंग भएनि मन परेली निथ्रुक्कै भिज्दोरहेछ
गुम्सिएका व्यथाहरुले आन्दोलन गरिरहँदा
उराठ उराठमै पीडाको पहाडले थिच्दोरहेछ ।
३.
शान्त रहनुपर्छ मनको तलाउ छल्कनु हुन्न
खुशीको घरमा पीरको आगो सल्कनु हुन्न
आवाजबिहिनको आवाज लिएर बोल्नेहरु
मौसमी बोली फेर्दै उत्तर दक्षिण ढल्कनु हुन्न ।
४.
गलत बाटो हिंड्दाको परिणाम बारम्बार रुनुपर्छ
सहमति सहकार्य पनि नीति नियमानुसार हुनुपर्छ
आफैले गरेका सहमति विर्सिएर बरालिन खोज्नेले
समस्या समाधानार्थ आफ्नै छाती लगातार छुनुपर्छ ।
५.
सानै गल्तीले गुम्ला नि पहिचान विचार पु¥याउनुस
सधैं गाउँछन् स्वार्थीले गुणगान विचार पु¥याउनुस
पाएको जिम्मेवारी इमान्दारीपूर्वक निभाएमा
बाँचिरहनेछ राष्ट्रिय स्वाभिमान विचार पु¥याउनुस ।