साताका पाँच मुक्तक

राजन सिलवाल, खोपासी

१.

आफ्नै जिन्दगीको रथ तान्न सकेको छैन

मान्नु पर्नेहरु धेरै छन् मान्न सकेको छैन

किताब सयौँ पढियो, हिँडियो लाखौँ पाइला

मृत्युभन्दा पर के छ, जान्न सकेको छैन ।

२.

यहाँ मर्न पनि, बाँच्न पनि लाम भेटिन्छ

सिंंगो जिन्दगीले गर्न नसक्ने काम भेटिन्छ

उस्तै नै लाग्छ मलाई जिन्दगी र सिक्का

एक पाटोमा नाम अर्कोमा बदनाम भेटिन्छ ।

३.

हामी भविष्य खोज्दै खोज्दै यो धरती सारा जान्छौँ

देशको माया लाग्छ सुस्ता, चाँदनी–दोधारा जान्छौँ

के छ कुन्नि त्यस्तो आँसुमा र आँसुजस्तै पानीमा ?

विकट छ, विकास छैन र पनि डोल्पा र रारा जान्छौँ ।

४.

जो जहाँ छौँ, इमान्दार छौँ कि छैनौँ भन्ने कुरा हो

देशको नुनप्रति बफादार छौँ कि छैनौँ भन्ने कुरा हो

सम्मान पनि दिएको देखिन्छ, विभुषण र पदक पनि

मुख्य सवाल होनहार छौँ कि छैनौँ भन्ने कुरा हो ।

५.

खुसी हुनु छैन मलाई कुनै फूलमाथि टेकेर

सोच्दिनँ नदीभन्दा माथि छु, पुलमाथि टेकेर

हृदयदेखि नै नमन गर्न मन लाग्छ मलाई

जो उठ्ने गर्छन् विगतका भूलमाथि टेकेर ।