जिल्ला निर्वाचन कार्यालयमा नचिताएको भीड, राजनीतिक दलको सुझबुझमा कमी

काभ्रे । फोटोसहितको मतदाता नामावली संकलन गर्ने कार्य निरन्तर गरिरहेको जिल्ला निर्वाचन कार्यालयलाई अहिले भ्याईनभ्याई भएको छ ।
उसले आफ्नो नियमित कार्य जिल्लामा बसेर गरिरहेको छ भने जिल्लाका १३ वटै पालिकामा क्रमशः मतदाता नामावली संकलन टोली खटाइरहेको छ । यति हुँदाहुँदै पनि केही दिनदेखि सदरमुकाममा रहेको कार्यालयमा मतदाताहरुको चाप ह्वात्तै बढेको छ । सो सम्बन्धमा जिल्ला निर्वाचन अधिकृत उमेशकुमार राईको कथन छ– राजनीतिक दलहरुको सुझबुझ नभएकै कारण एकाएक चाप बढेको हो । आजै समय सकिने, भोलि नै समय सकिने भनेर आफ्ना कार्यकर्ताहरुलाई सशंकित बनाएर सदरमुकाम पठाउने कार्य राजनीतिक दलहरुबाट भएको मतदाताहरुकै मुखबाट आफूले सुनेको स्मरण गराउनुहुँदै यसले समस्या सिर्जना भएको छ । अहिले प्रशासनिक कार्यका लागि चालकदेखि आफू समेत दिनभरि खटिएर अनलाइन इन्ट्री गर्ने काम गरिरहेको अधिकृत राईको गुनासो छ ।
अधिकृत राईका अनुसार दैनिक अहिले २ सयदेखि ३ सयसम्म मतदाताहरु आफ्नो फोटो खिचाउन मतदान केन्द्र ठाउँसारी गर्न आउने गरेको बताउनुभएको छ । यसले पालिकामा खटिएका टोलीहरुलाई भने कामको चाप कम देखिएता पनि सदरमुकाम भने समस्या सिर्जना भएको अधिकृत राईले चिन्ता व्यक्त गर्नुभएको छ । राजनीतिक दलहरुले आफ्ना कार्यकर्तालाई नसम्झाउने हो भने यसले समस्या ल्याउन सक्ने दाबी समेत अधिकृत राईले व्यक्त गरेका छन् । चुनाव घोषणा नभएसम्म फोटो सहितको मतदाता नामावली संकलन निरन्तर रहने भएको हुँदा मतदाताहरुलाई यस किसिमको भिडभाड नगर्न अधिकृत राईको आग्रह छ ।
एकाएक सेवाग्राहीहरुको चाप एकातिर बढेको छ भने अर्काेतर्फ ओमिक्रोन भाइरसको संक्रमण बढ्ने त होइन भन्ने चिन्ताले ग्रसित हुनुपर्ने अवस्था आएको छ । त्यसैले मतदाताहरुलाई संयमता अपनाउन अधिकृत राईले आग्रह गर्नुभएको छ ।