लैंगिक हिंसा र असमानता विरुद्ध समाचार लेख्न प्रदेश प्रमुख शेरचनको आग्रह

उर्मिला यादव
परासी । लुम्बिनी प्रदेशका प्रमुख अमिक शेरचनले केन्द्र सरकारले निजामती ऐन र प्रहरी ऐन पास नगरेकोले लुम्बिनी प्रदेशमा विभिन्न किसिमको गुनासो आएको र यसको निरन्तर रुपमा माग भईरहेको बताउनु भएको छ ।
संचारिका समूह लुम्बिनी प्रदेशले बुटवलमा आयोजना गरेको पत्रकार महिलाहरुका लागि लैंगिकमैत्री समाचार संप्रेषण सम्बन्धी तालिमको अवसरमा आम सञ्चार र पत्रकार महिलाको क्षमता अभिबृद्धि बिषयक अन्तरक्रिया कार्यक्रममा बोल्दै उहाँले सो कुरा बताउनु भएको हो । उहाँले यो दुबै ऐन प्रदेशलाइ संबैधानिक अधिकार हुँदाहुँदै पनि अझै सम्म कार्यान्वयन हुन नसकेकोले लुम्बिनी प्रदेशमा मात्रै नभएर देशको अधिकांश प्रदेशमा कर्मचारी अभाव देखिएको गुनासो गर्नुभएको थियो । उहाँले कर्मचारी अभावमा देखिने कामहरु गर्न नसकेको र त्यस्ता कामहरु ढिला हुने गरेको बताउनुभएको थियो ।
प्रदेश प्रमुख शेरचनले पत्रकारिता पेशा देशको सम्मानित पेशा भएकोले महिलाहरु पनि यहि पेशामा स्थापित हुनु गौरवको विषय भएको बताउनु भएको थियो । उहाँले पत्रकारहरुलाई समाजमा भएका लैंगिक हिंसा र असमानता विरुद्ध निरन्तर समाचार लेख्न आग्रह गर्नु भएको थियो । हाम्रो समाजमा महिला र बालबालिका माथि भएको हिंसाले समाजलाई दुषित बनाएको बताउँदै उहाँले यसको विरुद्ध पत्रकार महिलाहरु एकजुट भएर अभियानको रुपमा अगाडि बढाउन जोड दिनुभएको थियो ।
कार्यक्रममा बोल्नुहुँदै कानुन महिला बालबालिका तथा ज्येष्ठ नागरिक मन्त्री रमा घर्तीले सामाजिक न्याय, लैंगिक र महिलामैत्री समाज निर्माणका लागि संचारमा महिलाको समान उपस्थिति हुनुपर्ने बताउनु भएको थियो । उहाँले सरकारका हरेक संरचनामा महिलाको संख्या बढाउन, महिलामैत्री नीति कार्यक्रम ल्याउन पत्रकार महिलाहरुलाई संचारबाट वकालत गर्न आग्रह गर्नुहुँदै विषयगत ज्ञान र व्यवसायिक सीप बढाउने विषयमा पत्रकार महिलाहरुलाई सरकारले सधै सहयोग गरिरहने र लैंगिकमैत्री समाचार सम्प्रेषण गर्नुपर्नेमा जोड दिनुभएको थियो ।
यस्तैगरि उपसभामुख कृष्णी थारुले गठबन्धनका नाममा स्थानीय तहमा प्रमुख र उपप्रमुखमध्ये एक महिला हुने अवसर खोसिन लागेको बताउनु भएको थियो । उहाँले यस्तो हुन नदिन पत्रकारहरुलाई त्यसको विरुद्ध आवाज उठाउन आग्रह समेत गर्नु भएको थियो । कानुन महिला बालबालिका तथा ज्येष्ठ नागरिक मन्त्रालयका सचिव राजेन्द्र थापाले प्रदेश सरकारले ल्याएका लैंगिकमैत्री नीति तथा कार्यक्रमबारेमा जानकारी गराउनुभएको थियो ।
उहाँले प्रदेश सरकारले हरेक बजेटलाई लैंगिकमैत्री बनाउन पछिल्लो समयमा सरोकारवालासँग छलफल समेत थालेको जानकारी दिनुभएको थियो ।
तालिम सहजीकरण गर्दै वरिष्ठ पत्रकार संचारिका समूह नेपालका पूर्व अध्यक्ष बबिता बस्नेतले लैंगिकमैत्री समाचार, त्यसको उठान, श्रोत पहिचान, व्यवसायिक सीप विकास, स्थानीय तहको निर्वाचन र महिलाका समाचार विषयमा सहजीकरण गर्नु भएको थियो । उहाँले पुरुषको तुलनामा महिला स्थापित हुन समस्या र चुनौती भएपनि त्यसलाई समाधान गर्दै अगाडि बढ्नुपर्नेमा जोड दिनुभएको थियो ।
कार्यक्रममा पत्रकार इन्दिरा अर्यालले संचार माध्यममा लैंगिकताको विषय र त्यसको उठानबारे सहजीकरण गर्नु भएको थियो भने स्वास्थ्य निर्देशनालयका फोकल पसर्न कौशलराज भण्डारीले प्रजजन स्वास्थ्य, परिवार योजना र सुरक्षित मातृत्वको बारेमा सहजीकरण गर्नु भएको थियो । यस्तै गरि पत्रकार महासंघ रुपन्देहीका पूर्व अध्यक्ष शेरबहादुर केसीले प्रदेश सरकार, तिनका संरचना र कार्यक्रमको बारेमा कसरी समाचार बनाउन सकिन्छ भन्ने विषयमा सहजीकरण गर्नुभएको थियो । संचारिका समूह नेपाल लुम्बिनी प्रदेशको अध्यक्ष अमृता अनमोलको अध्यक्षतामा २ दिन सम्म चलेको कार्यक्रममा ६ जिल्लाका महिला पत्रकारहरुको सहभागिता रहेको थियो ।