चुनावी अभियान सभ्य र भव्य रुपमा चल्दै

रचना मोक्तान “यात्री”

काभ्रे । निर्वाचनको मिति नजिकिँदै गर्दा सम्पूर्ण जिल्लाहरुमा सबै दलहरु घरदैलो कार्यक्रममा व्यस्त भईरहँदा काभ्रे जिल्लाको रोशी गाउँपालिकामा गठबन्धनको संयुक्त चुनावी अभियान सयौं नेता कार्यकर्ता र जनताको साथमा भईरहेको छ।

अध्यक्ष पदमा नेपाली काङ्ग्रेसको उम्मेदवार दिनेश लामा र उपाध्यक्ष पदमा माओवादी केन्द्रको युवा तथा शालीन नेता मिम बहादुर वाइबा “ज्वाला” रहेका छन् । बैशाख १८ गतेबाट रोशी गाउँ पालिकाको १ नम्बरबाट सुरु भएको अभियान वडा नम्बर ७ र ८ मा जनताको घरदैलोमा पुगि आफ्नो प्रतिबद्धता सुनाउदै भोट माग्दै संयुक्त रुपमा हिडिरहेको छ। उपस्थिति सयौ कार्यकर्ता र जनतालाई सम्बोधन गर्दै अध्यक्ष पदको उम्मेदवार दिनेश लामाले सम्बोधनको क्रममा “आफूहरू एमालेले जस्तो ठूलाठूला सपना बढ्न आएका हैनौ , रोशीको डाँडाकाँडामा रेल कुदाउँदैनौ, रोशी खोलामा पानी जहाज चलाउदैनौ र घर घरमा ग्याँसको पाइप जोड्दैनौ र जोड्ने सपना पनि बाड्दैनौ तर रोशीमा प्रत्येक घरमा खानेपानीको धारा, बिजुलीको स्थायी पोल र लाइन, प्रत्येक वडामा पुग्ने मोटर बाटो र कृषिमा विभिन्न सुविधा युक्त वातावरण सिर्जना गर्छौ” भनेर भन्नू भयो भने अर्को उपाध्यक्ष मिम बहादुर वाइबा ज्वालाले सदियौ देखिको राजतन्त्र फाल्ने, समावेशीता, जातियाता,लैङ्गिक समानताको मुद्दा उठाउने पार्टीलाई जिताउनुपर्ने कुरामा जोड दिनु भयो।

सम्बोधनकै क्रममा उहाँले जनताको हितमा बनाएको संविधानलाई ध्वस्त बनाउन खोज्ने , तानाशाह केपि वली जस्ता भ्रष्ट नेता र एमाले पार्टीलाई नै पत्तासाप गर्दै गठबन्धनलाई जिताउनु पर्ने कुरालाई जोडदार रुपमा उठाएको छ भने आफूहरूलाई जिताउनोस भनी अनुरोध पनि गर्नु भएको छ । उक्त अभियानमा पूर्व सभासद ललिता किङरिङ मगर, माओवादी केद्रको रोशी गाउँ पालिका इन्चार्ज नवीन तामाङ, नेपाली काङ्ग्रेस रोशी गाउँ पालिका सभापति दुधराज लामाले सम्बोधन गर्नु भएको थियो। अभियान वडा नम्बर १२ मा पुगेर समापन हुने जानकारी गठबन्धन दलको प्रचार प्रसार समितिको संयोजक नवीन तामाङले जानकारी दिनु भयो ।