नगरवासीका बिच गरेका वाचाहरु पूरा हुनेछन् ः नगर प्रमुख भण्डारी

काभ्रे । पनौती नगरपालिकाको पदभार ग्रहण गर्ने क्रममा नगर प्रमुख रामशरण भण्डारीले गर्नुभएको पहिलो निर्णय जेष्ठ नागरिक स्वास्थ्य कार्यक्रमलाई विधिवत् रुपमा कार्यान्वयन गर्ने क्रममा बिहीबार पनौती नगरपालिका वडा नं. ७ अन्तर्गत मानेश्वरीमा भएको स्वास्थ्य सेवा कार्यक्रमको उद्घाटन गर्ने क्रममा सो भनाइ राख्नुभएको छ ।
सम्बोधनको क्रममा नगरवासीबीच गरिएका वाचाहरु क्रमशः पूरा गर्दै जाने क्रममा जेष्ठ नागरिक स्वास्थ्य कार्यक्रम शुभारम्भ भएको बताउनुभएको छ । आफ्नो पहिलो निर्णयलाई कार्यान्वयन गर्ने क्रममा आज जुन किसिमको कार्यक्रम शुभारम्भ भएको छ, यसले पक्कै पनि जेष्ठ नागरिकहरुलाई राहत मिल्ने विश्वास व्यक्त गर्नुभएको छ ।
सो कार्यक्रमको सम्बन्धमा पनौती स्वास्थ्य चौकीका ईन्चार्ज दिपेश घिमिरेका अनुसार नगरभित्रका सबै स्वास्थ्य संस्थाहरुले आ–आफ्नो अनुकुलतामा कार्यक्रम गरिरहेको र स्वास्थ्य चौकी पनौतीले भने उक्त कार्यक्रमलाई ५ वटा क्लष्टरमा विभाजन गरी सोही अनुसार बिहीबार मानेश्वरी मन्दिरको प्रांगणमा सेवा प्रदान गरेको बताउनुभएको छ । त्यसैगरी वडा नं. ७ अन्तर्गत कपालकोट, सोह्रखुट्टेपाटी, इन्द्रेश्वर मन्दिर प्रांगण र पनौती स्वास्थ्य चौकीमा ३÷३ महिनाको अन्तरमा उक्त कार्यक्रम सञ्चालन हुने बताउनुभएको छ । यसो गर्दा पनि सेवा लिन नसक्नेहरुका लागि घर–घरमै गएर पनि कार्यक्रमलाई सफल बनाउने इन्चार्ज घिमिरेले बताउनुभएको छ । पनौती स्वास्थ्य चौकीमा उपलब्ध प्रयोगशालामा हुने सबै परीक्षण गरिने र प्रत्येक महिनाको ८ गते रिपोर्ट सहित बीमामा जोडिउनुभएका सेवाग्राहीहरुका लागि धुलिखेल अस्पतालमा सेवा प्रदान गरिने समेत बताउनुभएको छ ।
मानेश्वरी प्रांगणमा भएको स्वास्थ्य कार्यक्रममा ३८ जना सेवाग्राहीहरुले सेवा प्राप्त गरेको घिमिरेले बताउनुभएको धार्मिक सञ्चारकर्मी विकुनारायण ताम्राकारले बताउनुभएको छ ।