सर्वाेच्चको अन्तरिम आदेशले चुनौती थपेको छ ः प्रमुख भण्डारी

काभ्रे । पनौती नगरपालिकाले उठाउँदै आएको वैकल्पिक सडक सेवा शुल्क दस्तुर विरुद्ध परेको रिटलाई लिएर सर्वाेच्च अदालतले पनौती नगरपालिकाका नाउँमा अन्तरिम आदेश जारीका सवालमा नगर प्रमुख भण्डारीले चुनौती थपेको तर्क गर्नुभएको छ ।
जुन आदेश सर्वाेच्चले दिएको छ, यसले नगरलाई त समस्या नपर्ला तर व्यवसायीहरुलाई भने पक्कै पर्ने छ । किनकी अहिले व्यवसायीहरुले जुन किसिमबाट उपयोग गरिराख्नुभएको छ, त्यसको वैकल्पिक व्यवस्था नहुने हो भने समस्या जटिल भएर आउनेछ । तब त्यतिबेला अन्तरिम आदेशको बारेमा आँखा खुल्नेछन् भन्ने विश्वास नगरले लिएको प्रमुख भण्डारीको टिप्पणी छ ।
न्यायपालिकाभन्दा माथि नगरपालिका रहने कुरै भएन । त्यसैले न्यायपालिकाको निर्देशनलाई अक्षरसतः पालना गर्दै समृद्ध नगर बनाउनका लागि कटिबद्ध रहनेछौं तर स्थानीय समस्या सम्बोधनका सवालमा पनौती नगरपालिका नगरवासीलाई सर्वाेपरी ठान्दछ । त्यसका लागि कुनै किसिमका सम्झौताहरु गर्ने छैन भन्न प्रमुख भण्डारी पछि पर्नु भएन । शुल्क नउठ्दैमा नगरले सुरु गरेका योजनाहरु रोकिने छैनन् । अझ मजबुद किसिमले योजनाहरुलाई अगाडि बढाउने छौं र वैकल्पिक सडकलाई समय सीमाभित्रै सुचारु गर्न नगर कटिबद्ध रहेको समेत प्रमुख भण्डारीको किटानी थियो ।
यस किसिमको न्यायिक फैसलाबाट पनौती नगरपालिकालाई चुनौतीको कठघरामा उभ्याइदिएको छ । जसका कारण पनौती नगरपालिकाको आन्तरिक आम्दानीमा करोडौंको क्षति व्यहोर्नुपर्ने अवस्था सिर्जना भएको छ । यसबाट स्थानीय सत्ता सञ्चालन ऐनलाई न्यायपालिकाले अंकुश लगाउने काम भएको सरोकारवालाहरुको दाबी छ ।
०६२÷०६३ को जनआन्दोलन, १० वर्षे जनयुद्धको जगमा बनेको संघीय संरचनाअनुसार प्राप्त अधिकारहरुलाई कुण्ठित गर्ने काम यस फैसलाले गरेको सरोकारवालाको ठम्याई छ । सो विषयमा सर्वोच्च अदालतका न्यायाधीशद्वय हरिप्रसाद फुयाँल र नहकुल सुवेदीको संयुक्त इजलासले पनौती नगरपालिकालार्ई दोहोरो कर नउठाउन अन्तरिम आदेश दिएको उल्लेख छ ।
बेथानचोक गाउँपालिकाका अध्यक्ष भगवान् अधिकारीले स्थानीय सरकार सञ्चालन ऐन, २०७४ विपरित कर उठाएको भन्दै सर्वाेच्चमा रिट दायर गरेका थिए । न्यायाधीशद्वय फुयाँल र सुवेदीले जारी गरेको आदेशमा आफ्नो क्षेत्रभन्दा बाहिरबाट आएका खानीजन्य सामग्रीमा कर उठाउनु नेपालको संविधानको धारा २३६ तथा स्थानीय सरकार सञ्चालन ऐन २०७४ को दफा २६२ (२) विपरित रहेको भनिएको छ । यसबाट उत्पन्न हुने समस्याका बारेमा नगरपालिकाले सहज रुपमा अवस्थालाई सम्बोधन गर्ने विश्वास नगरवासीले लिएका छन् ।