मध्यमार्ग कृषि सहकारीका ३५ सदस्यलाई १३६ प्लाष्टिक टनेल वितरण

काभ्रेपलाञ्चोक/ किसानहरु कृषि पेशाबाट पलायन हुने क्रम बढेका बेला काभ्रेपलाञ्चोक जिल्लाको पनौती नगरपालिका वडानम्बर ८ मा रहेको मध्यमार्ग कृषि सहकारी संस्थाको समन्वय र पनौती नगरपालिकाको कृषि शाखाको साझेदारीमा ३५ जना किसानहरुलाई १ सय ३६ वटा प्लाष्टिक टनेल वितरण गरिएको छ ।

सोमबार पनौतीमा आयोजित एक कार्यक्रमका बीच टनेल वितरण गरिएको हो । पनौती नगरपालिकाका उपप्रमुख गीता बञ्जारा र संस्थाका अध्यक्ष प्रदीप केसी बञ्जाराले कृषकहरुलाई टनेल वितरण गर्नुभयो । टनेल वितरण गर्दै उपप्रमुख बञ्जाराले पनौती नगरपालिकामा तरकारी प्रवद्र्धन कार्यक्रमका लागि आएको अनुदान हरेक किसानले एक पटक पाउने गरि नगरपालिकाले वितरण गरिरहेको बताउनुभयो । नगरपालिकाले विगतमा ०७६ सालदेखि यस्तो सहयोग गरिरहेको जानकारी दिनुहुँदै नगरका किसानलाई विभिन्न तालिमहरु प्रदान गरिरहेको र यसलाई निरन्तरता दिइने बताउनुभयो । नगरका १२ वटै वडामा तरकारी खेतीका लागि विभिन्न कार्यक्रमहरु ल्याइरहेको उहाँले जानकारी दिनुभयो । किसानहरुका लागि दूधमा पनि अनुदान दिइरहेको र तरकारी खेतीमा लागेका किसानलाई प्रोत्साहन गरिने बताउनुभयो ।
कार्यक्रममा नगरपालिकाका कृषि प्राविधिक सम्झना लिंखाले नगरपालिकाको ५० प्रतिशत अनुदानमा टनेल वितरण गरिएको बताउँदै यसलाई राम्ररी सदुपयोग गर्न किसानहरुलाई अनुरोध गर्नुभयो । उहाँले यसका लागि नगरपालिकाले बेलाबेलामा अनुगमन गर्ने पनि बताउनुभयो । संस्थाका अध्यक्ष प्रदीप केसी बञ्जाराले संस्थाले यस कार्यक्रमका लागि नगरबाट प्राप्त २ लाख २४ हजार ९सय अनुदान आएको र यति नै रकम किसानहरुबाट लगानी गरिएको जानकारी दिनुभयो । आफ्नो संस्था बिशुद्धरुपमा कृषक केन्द्रीत रहेको बताउँदै उहाँले रासायनिक मल उपलब्ध गराउनेदेखि किसानहरुका लागि आवश्यक हरेक गतिविधिहरुमा आफूले सकेको सहयोग गरिरहेको बताउनुभयो ।

अनुदानमा पाइएको टनेललाई सदुपयोग गर्ने र यसबाट सकेको फाइदा लिन आफूले के कसरी काम गर्नुपर्ने हो भन्ने बारेमा नगरपालिका र मध्यमार्ग कृषि सहकारीसँग सल्लाह र सहयोग लिने स्थानीय कृषक सुभद्रा बञ्जाराले बताउनुभयो । ‘मध्यमार्ग नभएको भए त हामीले खेती गर्नै नसक्ने रहेछौं । संस्थाले मल, बीउ र अन्य सहयोग धेरै नै गरेको छ । यसका लागि धेरै धेरै धन्यवाद ।’ – उहाँले भन्नुभयो । अर्की किसान स्वस्तिका बञ्जाराले पनि संस्थाले सहयोग गरेर अनुदानमा पाएका सामाग्रीको आफूले सदुपयोग गर्ने बताउनुभयो । ‘गाउँमै कमाउने, गाउँमै रमाउने’ नारासहित आफ्नो संस्था किसानको हितमा लागिरहने संस्थाका अध्यक्ष बञ्जारा बताउनुहुन्छ ।

कार्यक्रममा सहभागि किसानहरुले उत्पादनको उमित मूल्य नपाएकोमा गुनासो गरेका छन् । किसानले उत्पादन गरेका तरकारी लगायत अन्य उत्पादनको मूल्य लागत मूल्यभन्दा पनि कम भएकाले घाटा व्यहोर्नुपरेको उनिहरुको गुनासो । यतिबेला काभ्रेपलाञ्चोक जिल्लामा आलु खन्ने बेला छ । जिल्लाको पाँचखाल मण्डनदेउपुर, पनौत बनेपा लागयतका स्थानमा आलुको खेती हुने गरेको छ । आलुको पकेट क्षेत्र भएकाले पनि आलु धेरै उत्पादन हुने गर्दछ । तर यसपटक किसानले लागत मूल्य भन्दा पनि कम मूल्यमा आलु बिक्री गुर्नपरेको हो । यतिबेला किसानले खेतबाट ११ रुपयाँ देखि १५ रुपयाँ प्रतिकिलोमा आलु बिक्री गरिरहेका छन् । सस्तो मूल्यमा आलु बिक्री गर्नपनि भनेका बेला व्यापारी पाउने कठिन रहेको उनिहरुले बताएका छन् । यहाँ आलु उत्पादन गर्न प्रति किलो १५ देखि २० रुपयाँ खर्च हुने गरेको छ । भण्डारणको उचित प्रबन्ध नभएको र कृषि उत्पादनमा आधारित उद्योगहरु नभएकाले पनि किसान सस्तोमै आफ्ना उत्पादनहरु बिक्री गर्न बाध्य छन् ।