पाँचखालको बजेट ९९ करोड ९४ लाख, अघिल्लो बर्षको नीति तथा कार्यक्रम सवै ओझेलमा

आइ.आर.के.मैनाली
पाँचखाल/“पाँचखाल नगर,कृषि शहर” भन्ने मुल नारा लिएर अगाडी बढेको पाँचखाल नगरको सातौ नगरसभा सम्पन्न भएको छ । भेलाबाट आगामि आर्थिक बर्ष ०७७।७८ को लागि ९९ करोड ९४ लाखको बजेट प्रस्तुत भएको छ ।

नगरसभामा नगरका प्रमुख महेश खरेलले आ.व ०७७÷०७८ को नीति तथा कार्यक्रम प्रस्तुत गर्दै नगरका सम्पुर्ण जनप्रतिनीधि, कार्यपालिका सदस्यहरु साथै नगरवासिहरुको साथ र सहयोगले गर्दा सहज ढंगबाट बिकास निर्माणको कार्य गर्न सफल भएको बताउनु भयो ।

कार्यक्रममा नगर प्रमुख खरेलले नगरवासिहरुको सुझाव र सल्लाहको आधारमा हामी जनप्रतीनिधिहरु एक ढिक्का भएर निर्विवादित ढंगबाट अगाडी बढ्दा रचनात्मक कार्य गर्न सफल भएको बताउनु भयो । जन अपेक्षा अनुसारको धेरै कार्यहरु गर्न बाँकी छ , जुन कार्यको लागि जनप्रतीनिधिहरु एक जुट भएर अगाडी बढेको बताउनु भयो ।

जारी भएको वजेटले पाँचखालको हितमा कार्य हुने ठोकुवा गर्दै मदन भण्डारी बिश्वविद्यालय, काठमाडौ विश्वविद्यालयको शाखा पाँचखालमा संञ्चालन हुने हुंदा पाँचखालको मुहार फेरिने बताउनु भयो । पाँचखाल वासि,स्वास्थ्यकर्मी, सुरक्षाकर्मी, नगरका सम्पुर्ण कर्मचारीहरु लगायतको योगदानले गर्दा महामारीको रुपमा फैलिएको कोरोनासंग लड्न सहज भएको बताउनु भयो । पाँचखालको हितको खातिर कुनैपनि दल नभएको बताउंदै पाँचखाल दलको आधारमा अत्यन्त सौहार्द ढंगबाट अगाडी बढेको बताउनु भयो ।

नगरपालिकाका उप मेयर लक्ष्मी दनुवारले सार्वजनिक गर्नु भएको बजेटमा कृषि, पशुपंक्षी लाई बिगत बर्षहरुको तुलनामा अत्यन्त राम्रो बजेट सार्वजनिक गर्नुभएको छ । त्यसैगरी बिकास निर्माणको लागि सम्पुर्ण वडाहरुमा कालो पत्रे सडक पु¥याउने बिषयलाई प्रमुख प्राथमिकता दिईएको छ ।

वडाहरुले ६५ लाखको सिलिङमा रहेर आ—आफ्नो वडाको विकास निर्माणको लागि बजेट विनियोजन गरिएको छ । नगरमा विनियोजन गर्ने बजेटमा निर्विवादित साथै सौहार्द पुर्ण तरिकाले नगरको हितको खातिर योजनाहरु ल्याउने बिषयमा लामो छलफल भएको थियो । नगरका सुभचिन्तक एवं विकासप्रेमिहरुको सुझावलाई मध्यनजर राख्दै कार्यपालिकाको निर्णय अनुसार बजेट विनियोजन भएको थियो ।

त्यसैगरी नगरसभामा वडा नं २ का वडा अध्यक्ष हरिराम खतिवडा, वडा नं ७ का वडा अध्यक्ष एवं विधेयक संयोजक पुष्कर ढकाल,वडा नं ८ का वडा अध्यक्ष एवं नगरका प्रबक्ता शंजय तामाङ लगाएतले आ—आफ्नो धारणा राख्नु भएको थियो । नगरमा धेरै विकास निर्माणको कार्य गर्नुपर्ने भएकोले घाटा वजेट विनियोजन भएको छ । अघिल्लो बर्षमा भएको घाटा बजेटले गर्दा सम्पन्न विकास निर्माणको भुक्तानि दिन नसकिएको अवस्थामा पुन घाटा बजेट विनियोजन हुंदा आगामी बर्ष बिकास बजेटको अवस्था खस्कने संभावना रहेको वडा अध्यक्ष हरिराम खतिवडाको तर्क थियो ।

अघिल्लो बर्षको नीति तथा कार्यक्रममा नगरप्रमुख खरेलले प्रस्तुत गर्नुभएको कार्यक्रम मध्यको एक वडा एक कालोपत्रे सडक बाहेकका अन्य नीति नियम ओझेलमा परेको छ । विगतमा सरकारी कार्यालयहरुमा अपाङ्ग मैत्रि बनाउने, पाँचखालमा सेभ हाउस सञ्चालन गर्ने, ३५ दिन भित्र व्यक्तिगत घटना दर्ता गराउनेलाई प्रोत्साहन भत्ताको व्यवस्था गर्ने, नगरमा एक वडा एक पोखरी अनिवार्य गर्ने भन्ने अभियानलाई बढाउंदै नगरको बिभिन्न स्थानहरुमा गरी १०८ पोखरी निर्माण गर्ने, विपद व्यवस्थापनको लागि कोषको व्यवस्था गर्ने, नगरमा रहेका विद्यालयहरुमा इन्टरनेटको माध्यमबाट पठन पाठनको व्यवस्था गर्ने, नगरमा रहेको ऐलानि तथा पर्ती जग्गाको खोजिगरी नगरको मातहतमा ल्याउने, नगरका सवै वडाहरुमा अनलाईनको व्यवस्था गर्ने लगायतको नीति तथा योजना सार्वजनिक गरेको थियो ।

०७६ असार ३० गते घोषणा गरेको नीति तथा कार्यक्रमहरु एक बर्ष सम्म कुनै (कार्यान्वयन) लागु हुन सकेन नीति नीयमको ठेलिमै सिमित भयो । ठिक एक बर्ष पछि ०७७ असार ३१ मा भएको नगरसभाले विगतको बर्षहरुमा तयार गरेको नीति नियमलाई ओझेलमा पार्दै पुन नीति नीयम जारी भयो । विगतलाई निरन्तरता दिन नसक्नु र बार्षिक रुपमा नयाँ नयाँ नीति नियम बन्नुलाई नगरवासिहरुले “डुंगा हिड्दैछ, पाईला मेट्दै छ ” को संज्ञा दिएका छन् । मेयर आफैले जारी गरेको नीति तथा कार्यक्रमलाई आफैले निरन्तरता दिन नसक्दा सातौ नगरसभामा पारित भएको नीति तथा कार्यक्रमको पनि कुनै औचित्य नभएको जनप्रतीनिधिहरुकै भनाई रहेको छ ।

जनप्रतीनिधिहरु निर्वाचित भएर सपथ लिएकै दिनको मन्तव्यमा भनिएको थियो—नगरमा रहेका सम्पुर्ण ऐलानि तथा पर्ति जग्गाको संरक्षण गर्ने, कसैले भोगचलन गरेको भए त्यसलाई नगरको मातहतमा ल्याएर सुरक्षीत गर्ने बताईएको थियो । सोही भनाईलाई अघिल्लो नगरसभासम्म नीति तथा कार्यक्रममा समेट्दै आएपनि सातौ नगरसभाबाट समेट्न समेत सकेको छैन ।